ᓄᐃᑕᐅᔪᑦ N° 12
ᖃᕐᔪᐃᑦ ᐅᕕᒃᑫᑦ ᑲᑎᒪᔨᖏᑦ ᙯᒋᐊᕕᑦᑐᑦ ᐃᓕᑦᓯᓄᑦ!
ᖃᐅᔨᒪᕖᑦ ᖃᕐᔪᐃᑦ ᐅᕕᒃᑫᑦ ᑲᑎᖕᖓᔨᖏᑦ ᐸᕐᓀᓯᒪᒻᒪᑕ ᓄᓇᓕᓕᒫᓂ ᐅᕕᒃᑲᓂᑦ ᖃᐅᔨᒋᐊᕐᕕᖃᕐᓂᒧᑦ ᐊᕐᕕᑕᓛᕐᓂᐊᒪᑕ ᓇᓪᓕᐅᑎᒋᐊᕕᑦᑐᒥᒃ? ᖃᐅᔨᒋᐊᕐᓂᕕᓂᖏᑦ ᑭᖑᓪᓕᐹᒥ ᑲᑎᖕᖓᔩᑦ ᐊᒥᕃᔭᐅᒦᓯᒪᔪᖅ 2019-ᖑᑎᓪᓗᒍ, ᒪᕐᕉᓂ ᐅᓪᓘᓂ ᓱᖃᑦᓯᓂᖃᕐᑎᓯᑦᓱᑎᓪᓗ. ᑲᑎᑦᓱᒋᑦ 30 ᐅᕕᒃᑫᑦ ᐃᓚᐅᔪᕕᓃᑦ, 14-ᓂ ᓄᓇᓕᓐᓂ ᐱᒍᑦᔨᓂᖃᕐᓱᑎᒃ ᓄᓇᕕᒻᒥᐅᓂᑦ ᐊᒻᒪᓗ ᓯᓵᓯᐱᒻᒥᐅᓂᑦ. ᑖᓐᓇ ᓱᖃᑦᓯᓂᖅ ᐃᓂᓪᓚᑎᕐᑕᐅᓯᒪᔪᖅ ᖁᐊᕐᑕᒥ ᓴᐳᑦᔭᐅᓂᒃᑯᑦ Exeko-ᒃᑯᓄᑦ. ᓯᕗᓪᓕᐹᒥ ᖃᐅᔨᒋᐊᕐᕕᖃᕐᓃᑦ ᖃᕐᔪᐃᑦ ᐅᕕᒃᑫᑦ ᑲᑎᖕᖓᔨᖏᑦᑕ ᐸᕐᓇᓯᒪᔭᖏᑦ 2016-ᒦᓯᒪᔪᑦ, ᓄᐃᑦᓯᒐᓱᐊᖁᓪᓗᒋᑦ ᐅᕕᒃᑫᑦ ᐱᒻᒪᕆᐅᔪᖁᑎᖏᓐᓂ ᑲᑎᖕᖓᔩᑦ ᒥᑦᓵᓄᑦ. ᖃᐅᔨᒋᐊᕐᕕᖃᕐᓂᖃᓲᖑᔪᒍᑦ ᐊᕐᕌᒍᐃᑦ ᐱᖓᓱᑦ-ᓯᑕᒪᓪᓘᓃᑦ ᐊᓂᒍᕐᒪᑕ ᐳᓛᕆᐊᕆᐊᓪᓛᕈᑎᖃᕐᓱᑕ ᐱᒻᒪᕆᐅᔪᖁᑎᑦᑎᓂ. ᐋᐊ, ᑖᓐᓇ ᑲᑎᖃᑎᖃᕐᓂᖅ ᐅᕕᒃᑲᓂᑦ ᐊᑐᕐᓂᖃᓪᓚᕆᓲᖅ ᑲᔪᓯᑦᓯᐊᑐᒥ ᐱᕙᓪᓕᐊᕈᓐᓇᓯᖁᓪᓗᑕ ᐊᕐᖁᑎᑦᓴᑎᓐᓂ ᐃᓚᐅᔫᔪᖁᑎᕗᓪᓗ ᓈᓚᓪᓗᒋᑦ ᐅᖄᕈᑎᖃᕐᑎᓗᒋᑦ ᑭᖕᖒᒪᒋᔭᖏᓐᓂᑦ, ᐃᓱᒫᓘᑎᖏᓐᓂᑦ ᐊᒻᒪᓗ ᐃᓱᒪᒋᔭᖏᓐᓂᑦ ᒪᓕᑦᓯᐊᑑᖁᓪᓗᒋᑦ ᐱᓇᓱᐊᕈᑎᒋᓲᑦᑎᓄᑦ ᐅᓪᓗᑕᒫᑦ. ᓂᕆᐅᒋᔭᑦᑎᒍᑦ, ᓇᓕᕐᙯᑑᓛᕐᑐᒥ 2024-ᒥ ᖃᕐᔪᐃᑦ ᑲᑎᖃᑎᖃᕆᐊᖃᓛᓕᕐᒥᔪᑦ ᐅᕕᒃᑲᓂᑦ ᓄᓇᕕᓕᒫᒥᐅᓂᑦ, ᖃᐅᔨᒋᐊᕐᕕᖃᕐᓗᑎᒃ ᐱᖓᔪᒋᔭᖓᓐᓂᑦ ᐊᒻᒪᓗ ᖃᐅᔨᓴᕐᓂᖃᖁᓪᓗᑕ ᐅᕕᒃᑫᑦ ᐃᓱᒪᒋᔭᖏᓐᓂᑦ ᐱᒍᑦᔨᓯᐊᕈᓐᓇᖁᓪᓗᑕ ᐊᒫᓪᓗᑐᖏᓐᓂᒃ ᐱᓯᒪᔪᓂ ᐱᕈᕐᐸᓕᐊᓃᑦ ᓴᓂᐊᓂ ᐊᒻᒪᓗ ᐱᕙᓪᓕᐊᓂᖓᓂ ᖃᕐᔪᐃᑦ ᐅᕕᒃᑫᑦ ᑲᑎᖕᖓᔨᖏᑦ, ᐱᒋᐊᕐᐸᓕᐊᓂᑦᑎᓂ ᐊᕐᕌᒍᒋᔭᑦᑎᓂ 9-ᒥ!
ᖃᕐᔪᐃᑯᑦ ᓄᐃᑕᕗᑦ, ᖃᐅᔨᒪᒐᕕᑦ, ᑭᒡᒐᑐᕋᓱᐊᕐᓱᑎᑦ ᐃᓄᑐᐃᓐᓇᓂᑦ ᐅᕕᒃᑲᓂᑦ, ᐅᑭᐅᓕᓐᓂ 15-ᒥ 35-ᒧᑦ ᓄᓇᕕᓕᒫᒥ ᐊᒻᒪᓗ ᓯᓵᓯᐱᒥ. ᑕᒪᓐᓇ ᑐᑭᖃᕐᖁᖅ ᑐᕌᒐᖃᕐᑐᒍᑦ ᐱᒍᑦᔨᕋᓱᐊᕐᓂᒥᒃ ᐅᓄᕐᓂᓕᓐᓂᒃ 4 400-ᓂᑦ ᐅᕕᒃᑲᓂᑦ. ᑌᑦᓱᒪᓂ, ᖃᐅᔨᒋᐊᕐᕕᖃᖃᑦᑕᑎᓪᓗᑕ, ᓂᕈᐊᖃᕐᑕᓯᒪᔪᒍᑦ ᐃᓚᐅᔪᑦᓭᑦ ᐅᓄᕐᓂᖏᓐᓂᑦ ᐊᐅᓪᓚᕈᓐᓇᑐᐃᑦ ᒪᓕᑦᓱᒋᑦ ᑖᑦᓱᒧᖓ ᐱᒻᒪᕆᐅᓗᒻᒧᑦ ᖃᐅᔨᒋᐊᕐᓂᒧᑦ. ᓇᓗᓀᕐᓯᓃᑦ ᑐᖕᖓᕕᒋᑦᓱᒋᑦ ᐅᕕᒃᑫᑦ ᐃᓚᐅᒍᒪᓂᓪᓚᕆᖏᑦ ᑐᑭᑖᕐᑕᐅᓲᑦ ᐃᓕᒐᓱᐊᕈᑎᖏᑦᑕ ᑕᑕᕐᓴᓯᒪᔭᖏᑦ. ᑌᒪᖕᖓᑲᓵᖅ, ᒪᕐᕉᒃ ᐅᕕᒃᑳᒃ ᓄᓇᓕᓐᓂ ᐊᑐᓂ ᙯᖁᔭᐅᓲᑦ, ᑕᒪᓐᓇᓗ ᓈᒻᒪᓈᑦᓯᐊᕋᓂ ᐱᒍᑦᔨᓯᐊᖁᓪᓗᑕ ᐊᑦᔨᒌᖕᖏᑐᓂᑦ ᐅᕕᒃᑫᑦ ᐱᓀᓗᑕᒋᓲᖏᓐᓂ ᓄᓇᓕᓐᓂ ᐊᑐᓂ. ᑕᒡᒐᓂ ᐊᕐᕌᒍᒥ, ᖃᕐᔪᐃᑦ ᐅᕕᒃᑫᑦ ᑲᑎᖕᖓᔨᖏᑦ ᑐᑭᑖᕐᓯᒪᔪᑦ ᐊᓯᐊᒍᑦ ᐱᓂᐊᕐᓂᖃᓛᕐᓂᐊᓂᕐᒥᓂᒃ ᐊᑑᑎᓚᐅᕐᓯᒪᖕᖏᑕᒥᓂᒃ ᓄᓇᓕᓕᒫᓂ ᐳᓛᕆᐊᕐᓂᒥᒃ. ᐱᒋᐊᖕᖓᓂᖃᓛᕐᑐᑦ ᓇᓕᕐᙯᑐᖅ 2024-ᒥ, ᑲᑎᖕᖓᔨᕗᑦ, ᐃᓚᐅᑎᓪᓗᒋᑦ ᐳᕐᑐᓂᕐᓴᖁᑎᕗᑦ ᓄᓀᑦ ᐊᕕᑦᑐᓯᒪᓂᖏᓐᓄᑦ ᐱᖓᓱᐃᓄᑦ ᐁᓛᕐᓂᐊᑐᑦ ᓄᓇᓂᑦ ᑭᒡᒐᑐᕋᓱᐊᕐᑕᑎᓐᓄᑦ.
ᓱᓇᐅᕙ ᖃᐅᔨᒋᐊᕐᓂᖅ ᐊᒻᒪᓗ ᖃᓄᖅ ᐃᓚᐅᓕᕈᓐᓇᖁᖓ?
ᖃᐅᔨᒋᐊᕐᓂᖅ ᓄᐃᑕᐅᓯᒪᕗᖅ ᐅᕕᒃᑫᑦ ᐱᕕᑦᓴᖃᖁᓪᓗᒋᑦ ᐅᐯᒍᓐᓇᕕᖃᕐᓗᑎᒃ ᐊᕐᓱᕈᕐᓇᑐᓂᒃ ᐅᖄᕈᑎᖃᕆᐊᕐᑐᓗᑎᒃ ᐊᒻᒪᓗ ᐃᓱᒪᒋᔭᒥᓂᒃ. ᐊᐱᕐᓲᑎᓪᓗᑐᐃᑦ ᐊᐱᕐᓲᑎᐅᖃᑦᑕᓛᕐᑐᑦ ᐊᑑᑎᓲᓐᓂ ᐅᖄᕈᓐᓇᖁᓪᓗᑎᑦ ᓱᓇᓂ ᐱᑦᔪᑎᖃᓪᓗᑐᓲᖑᒻᒪᖔᕐᐱᑦ, ᓱᓇᓂᒃ ᐱᔪᓐᓇᐅᑎᖃᕐᒪᖔᕐᐱᑦ ᐊᒻᒪᓗ ᖃᐅᔨᒪᓂᖃᕐᒪᖔᕐᐱᑦ, ᓱᓇᓂᒃ ᑕᑯᓐᓇᐅᔮᕈᑎᖃᓲᖑᒻᒪᖔᕐᐱᑦ ᐊᒻᒪᓗ ᓂᕆᐅᓐᓂᖃᕐᒪᖔᕐᐱᑦ ᒥᑭᔫᑎᓪᓗᒋᑦ ᐊᖏᔫᑎᓪᓗᒋᓪᓗ, ᐊᓯᖏᓪᓗ. ᐊᑦᔨᒌᖕᖏᑐᓂᒃ ᐱᖕᖑᐊᕈᓯᕐᓂᒃ, ᓱᖃᑦᓯᐅᑎᓂᑦ ᐊᒻᒪᓗ ᐅᖄᕈᑎᖃᕐᓂᑯᑦ ᐊᑑᑎᓂᒃᑯᑦ, ᐃᓕᓐᓂᒃ ᑐᓴᕈᒪᔪᒍᑦ ᐊᒻᒪᓗ ᑲᔪᓯᑦᓯᐊᖁᓪᓗᒋᑦ, ᓇᓗᓀᕐᓯᒪᔭᕗᑦ ᐱᒻᒪᕆᐅᔪᖁᑎᒋᓗᒋᑦ ᐊᕐᕌᒍᓂᒃ ᙯᔪᓂ ᖃᕐᔪᐃᑦ ᐅᕕᒃᑫᑦ ᑲᑎᒪᔨᒃᑯᖏᓐᓂ, ᓱᓕᑦᓯᐊᑐᒥᒃ ᑕᒪᒃᑯᐊ ᐱᒻᒪᕆᐅᔪᖁᑎᒋᔭᓯᓐᓄᑦ ᑐᕌᑦᓯᐊᖁᓪᓗᒋᑦ.
2016 ᐱᒻᒪᕆᐅᔪᖁᑏᑦ
· ᐃᓱᒪᒃᑯᑦ ᐃᓗᓯᕐᓱᓯᐊᕐᓂᖅ
· ᐃᓕᓐᓂᐊᓂᖅ
· ᑭᖑᕚᑦ ᖃᓂᑕᕇᓐᓂᖏᑦ ᐊᒻᒪᓗ ᐃᓗᕐᕈᓰᑦ
· ᐅᕕᒃᑫᑦ ᐱᑐᑦᓯᒪᖃᑎᒌᓐᓂᖏᑦ
2019 ᐱᒻᒪᕆᐅᔪᖁᑏᑦ
· ᐃᓱᒪᒃᑯᑦ ᐃᓗᓯᕐᓱᓯᐊᕐᓂᖅ
· ᐃᓕᓐᓂᐊᓂᕐᒥᒃ ᓴᐱᓕᕐᑌᓕᓂᖅ
· ᐃᓄᐃᑦ ᑭᓇᐅᓂᖏᑦ
· ᐅᕕᒃᑫᑦ ᐱᑐᑦᓯᒪᖃᑎᒌᓐᓂᖏᑦ
ᑕᒪᒃᑯᐊ ᐱᒻᒪᕆᐅᔪᖁᑏᑦ ᓱᓕᑦᓯᐊᑑᖏᓐᓇᖃᑦ ᑕᑯᓐᓇᕈᓯᑎᓐᓄᑦ? ᓱᓕᑦᓯᐊᑑᕚᑦ ᖃᐅᑕᒫᑦ ᖃᕐᔪᐃᑦ ᐃᕕᒃᑫᑦ ᑲᑎᖕᖓᔨᖏᓐᓄᑦ ᐱᓇᓱᐊᕐᑕᐅᖁᔭᑎᑦ ᐱᑐᑦᓯᒪᐅᑎᒋᓗᒋᑦ? ᐊᓯᖏᓐᓂᑦ ᐱᒻᒪᕆᐊᓗᓐᓂᒃ ᑭᖕᖒᒪᒋᔭᐅᔪᓂᑦ ᑲᑎᖕᖓᔨᓄᑦ ᐊᑑᑎᔭᐅᖁᔭᑎᓐᓂᑦ ᐱᑕᖃᕆᐊᓪᓚᖃ? ᑌᒫᒃ ᐊᐱᕐᓲᔭᕐᓂᖃᕈᒪᔪᒍᑦ ᐅᖄᖃᑎᖃᕐᓗᑕ ᐊᒥᓲᒐᓱᐊᕐᑐᓂᒃ ᐅᕕᒃᑲᓂᑦ ᓄᓇᓕᓐᓂ ᐊᑐᓂ. ᓱᕐᕃᒐᓱᐊᕈᓐᓇᑐᒍᑦ ᓲᖑᔪᓪᓚᕆᒻᒥᒃ ᓱᓕᑦᓯᐊᓚᕆᑦᑐᒥᒃ ᑲᕙᒪᒃᑯᑦ ᐱᑐᑦᓯᒪᐅᑎᓕᒫᖏᓐᓂ – ᓄᓇᓕᓕᒫᑎᒍᑦ, ᑯᐯᒃᒥ ᐊᒻᒪᓗ ᓄᓀᑦ ᐊᕕᑦᑐᓯᒪᓂᖏᓐᓂ – ᐅᕙᖓ, ᖃᐅᔨᒪᕈᒪ ᐃᓱᒪᒋᔭᑦᓯᓂᒃ, ᐅᖃᐅᓯᑦᓴᓯᓐᓂ ᑐᓵᓂᒃᑯᑦ ᐊᒻᒪᓗ ᐃᓱᒪᒋᔭᑦᓯᓂ ᐊᒻᒪᓗ ᑕᒪᒃᑯᐊ ᓂᑦᔮᓯᐊᕐᓗᑕ ᑐᓴᐅᒪᔭᐅᑎᑦᓯᐊᖁᓪᓗᒋᑦ, ᐊᒻᒪᓗ ᓱᒋᐊᕐᓂᖃᖃᑦᑕᖁᓪᓗᑕ ᐱᐅᓯᐅᒥᒋᐊᖁᓪᓗᒋᑦ ᐃᓅᑦᔪᓯᒋᔭᕗᑦ.
ᑐᓴᐅᒪᕋᓱᐊᑦᓴᓂᐊᓛᕐᖁᑎᑦ ᑐᓴᐅᒪᑎᑦᓯᒍᑎᓂ ᐊᑑᑎᓛᕐᓂᐊᑐᒥᒃ ᖃᕐᔪᐃᑦ ᐅᕕᒃᑫᑦ ᑲᑎᖕᖓᔨᖏᑦᑕ ᓄᓇᓕᓕᒫᓄᑦ ᖃᐅᔨᒋᐊᕐᕕᖃᕐᑎᓗᒋᑦ!
ᑭᐊᕈᓓᓐ ᒪᕐᑎᐊᓪ – ᖃᕐᔪᐃᑦ ᐅᕕᒃᑫᑦ ᑲᑎᖕᖓᔨᖏᑦᑕ ᖃᐅᔨᓴᕐᑎᖓ
ᐊᑦᔨᓕᐊᕕᓃᑦ : ᐊᑦᔨᖑᐊᑦ ᐊᑦᔨᓕᐊᕕᓃᑦ ᖁᐊᕐᑕᒥ ᖃᐅᔨᒋᐊᕐᓂᖃᕐᑐᕕᓂᐅᑦᓱᑕ 2019-ᖑᑎᓪᓗᒍ
[CM1]Add the website: https://exeko.org/en/about-us
