ᓄᐃᑕᐅᔪᑦ N° 10

ᖃᕐᔪᐃᑦ ᐅᕕᒐᕐᑐᐃᑦ ᑲᑎᒪᔨᖏᑦ ᐊᕐᕌᒍᑕᒫᕐᓯᐅᑎᒥᓂᒃ ᑲᑎᒪᓂᒻᒪᕆᖃᓲᑦ ᐅᑭᐅᓖᑦ 15- ᓂᑦ 35-ᓄᑦ ᓄᓇᕕᒻᒥᐅᑦ ᑲᑎᓲᑦ ᐸᕐᓀᕈᑎᓕᐅᕐᓱᑎᒃ ᐊᕐᕌᒎᓚᖓᔪᒧᑦ ᐅᖄᒍᑎᖃᕐᓱᑎᒃ ᓯᕗᓪᓕᐅᔨᒐᑦᓴᒥᓂᒃ, ᑮᓇᐅᔭᓄᑦ ᑐᕌᒐᕐᓂᒃ, ᐸᕐᓀᕆᐊᓪᓚᕋᑦᓴᓂᓪᓗ, ᓱᓇᓱᐊᕐᑎᑕᐅᒍᑎᑦᓴᖏᓐᓂᓗ ᐅᕕᒐᕐᑐᐃᑦ.

2021-ᒥ ᑲᑎᒪᓂᕗᑦ ᐊᑦᔨᐅᖏᓐᓂᓴᒻᒪᕆᐅᓚᐅᔪᕗᖅ, ᓯᕗᓪᓕᐹᑦᓯᐊᒥ ᐅᓪᓗᖁᑎᖃᓚᐅᔪᒐᑦᑕ ᓭᒻᒪᐅᑎᒋᐊᖃᕐᓂᒧᑦ ᓯᓵᓯᐱᒦᑦᓱᑕ, ᓄᓇᓕᓐᓄᑦ 15-ᒍᒍᑕᐅᒻᒪᑦ ᑭᒡᒐᑐᑕᑎᓐᓂ ᓄᓇᓕᓐᓂ. ᐃᑉᐱᒍᓱᓚᐅᔪᕗᖓ ᐊᑦᔨᒌᖕᖏᑐᓂᒃ ᐅᕕᒐᕐᑐᐃᑦ ᐃᓱᒫᓘᑎᖃᖃᑦᑕᓚᐅᔪᒻᒪᑕ ᐅᖃᐅᓯᑦᓴᓕᒻᒪᕆᐅᑦᓱᑎᓪᓗ. ᑌᒣᒻᒪᑕᒐ, ᖃᕐᔪᐃᑦ ᓯᕗᓪᓕᐅᔨᒍᒪᓲᒍᓚᕿᕗᑦ ᓂᐸᖃᕐᑎᓯᓂᕐᒥᒃ
ᐅᕕᒐᕐᑐᓂᒃ ᑭᖕᖒᒪᒋᔭᖏᓐᓂᓗ ᐊᑦᔨᒌᖕᖏᑐᓄᑦ ᐱᓇᓱᕝᕕᓄᑦ ᓂᑦᔮᕈᑎᒋᓗᒋᑦ ᑲᑐᑦᔨᓗᑕ ᓯᕗᒻᒧᕆᐊᕐᓂᐊᕋᑦᑕ, ᓈᓚᖃᑦᑕᓗᑕ ᐅᕕᒐᕐᑐᐃᑦ ᐃᓱᒪᒋᔭᖏᓐᓂᒃ ᓯᕗᓪᓕᐅᔨᒐᑦᓴᖏᓐᓂᓗ.

ᐅᓪᓗᐃᑦ ᐱᖓᔪᐊᓐᓂ ᑲᑎᒪᓂᑦᑕ, ᐅᕕᒐᕐᑐᓂᒃ ᐊᐱᕐᓱᓚᐅᔪᕗᒍᑦ ᓱᓇᓂᒃ ᐃᓱᒫᓗᒋᔭᖃᕐᒪᖔᑕ ᓱᓇᓂᓪᓗ ᐱᐅᓯᒋᐊᕐᑕᐅᖁᔨᒻᒪᑕ ᓄᓇᓕᒥᓂ. ᐊᒥᓱᑦ ᓯᓂᒋᐊᕐᑐᕕᑦᓴᖃᕈᒪᓚᐅᔪᕗᑦ ᐊᑦᑕᓀᑦᑐᓯᐊᒦᒍᒪᑦᓱᑎᒃ. ᐃᓱᒫᓗᒋᔭᖃᕐᓂᕋᕐᓂᒥᑦᓱᑎᒃ ᓄᓇᓖᑦ ᐊᒥᓲᓂᕐᓴᑦ ᐱᓕᐅᑦᔨᒍᑎᓂᒃ ᐱᖕᖑᐊᕕᑦᓴᓂᒃ ᐱᖕᖕᒍᐊᕕᑦᓴᖃᖕᖏᓂᕋᕐᓱᒋᑦ. ᐃᓕᓴᕐᕖᑦ ᐱᖕᖑᐊᕕᖏᓐᓂ ᐱᖕᖑᐊᓲᒍᓯᒪᒐᓗᐊᕐᒥᓱᑎᒃ ᐃᓱᐊᓈᑲᓪᓚᑐᐊᕋᒥᒃ. ᐃᓱᒫᓗᒋᔭᖃᕐᓂᒥᔪᑦ ᐱᖕᖑᐊᕖᑦ ᐊᑯᓂᓂᑕᖕᖑᐸᓪᓕᐊᓕᕐᓂᖏᓐᓂᒃ. ᐅᕕᒐᕐᑐᐃᑦ ᐅᓄᕐᓂᓭᑦ ᑕᖃᒪᐅᑎᖃᓪᓚᕆᓐᓂᕋᕐᓂᒥᔪᑦ, ᐃᓪᓗᒥᐅᖃᑎᒋᔭᐅᑐᐃᓐᓇᕆᐊᒥᒃ ᐊᖓᔪᕐᖄᒥᓄᑦ ᐋᖓᔮᑐᐃᓐᓇᑐᓄᑦ
ᐋᖓᔮᓐᓇᑐᕐᑐᑐᐃᓐᓇᑐᓄᓪᓗ. ᐅᕕᒐᕐᑐᐃᑦ ᐃᑉᐱᓂᐊᕈᑎᖃᖃᑦᑕᓂᕐᖁᑦ ᑕᒪᑐᒥᖓ ᐅᖄᒍᑎᖃᓕᕋᒥᒃ ᑕᒪᓐᓇᓗ ᐱᓪᓚᕆᐊᓘᔪᕆᒻᒥᔭᕋᓕ ᐊᑐᐊᕋᑦᓴᐅᓂᐊᕐᑎᓗᒋᑦ. ᐅᕕᒐᕐᑐᐃᑦ ᐊᓕᐊᑦᑐᒪᕆᐅᓐᓂᖁᑦ ᑕᒪᒃᑯᓂᖓ ᑐᓴᕐᑕᐅᑎᑦᓯᒋᐊᒥᒃ ᓂᐱᖃᕐᑎᑕᐅᓂᖏᓐᓂᓗ ᐅᕕᒐᕐᑐᐃᑦ ᐊᓯᖏᑦ.

ᑲᑎᒪᔨᐅᑦᓱᖓ ᓄᕗᒻᒥᐅᓂᒃ ᑭᒡᒐᑐᕐᓱᖓ ᖃᕐᔪᐃᑦ ᐅᕕᒐᕐᑐᐃᑦ ᑲᑎᒪᔨᖏᓐᓂᒃ, ᑐᓴᕐᑕᐅᖁᔨᓯᒪᒐᒪ ᑕᒪᒃᑯᓂᖓ ᐱᓪᓚᕆᐅᑦᓱᑎᒃ ᑭᖕᖒᒪᒋᔭᐅᔪᓂᒃ ᐅᕕᒐᕐᑐᓄᑦ. ᑖᒃᑯᐊ ᐅᕕᒐᕐᑐᐃᑦ ᑲᓇᑕᒥᐅᓕᒫᒍᒻᒪᑕ ᐱᒍᑦᔭᐅᕙᒋᐊᖃᕐᓱᑎᓪᓗ ᓈᒻᒪᖁᐊᕆᔭᐅᔪᓂᒃ
ᐊᓯᖏᑦᑕ ᐅᕕᒐᕐᑐᐃᑦ ᐱᒍᑦᔭᐅᒍᑎᒋᓲᖏᑦᑕ. ᓲᑭᐊᒍᒐᓗᐊᖅ, ᐃᓄᐃᑦ ᐅᕕᒐᕐᑐᐃᑦ ᐊᑐᐃᓐᓇᖃᕐᑎᑕᐅᖕᖏᒪᑕ ᐃᑲᔪᕐᑕᐅᒍᑎᐅᓲᓂᒃ ᐱᒍᓐᓇᕕᓕᒫᒥᒍᑦ ᐱᓇᓱᒍᓐᓇᕈᑎᑦᓴᒥᓂᒃ. ᑕᒪᓐᓇ ᐊᓯᑦᔨᒋᐊᓕᕗᑦ ᑖᒃᑯᐊᓗ ᓯᕗᓪᓕᐅᔨᒐᑦᓭᑦ ᐱᓪᓚᕆᐅᑎᑦᓯᐊᓗᒋᑦ

ᐊᑦᔨᒌᖕᖏᑐᓄᑦ ᐱᓂᐊᕐᓂᓕᕆᔨᓄᑦ ᐅᖃᐅᓯᕆᑦᓯᐊᓗᒋᑦ ᐃᑲᔪᕐᑕᐅᒍᑎᑦᓴᓂᒃ ᓄᐃᑦᓯᖃᑦᑕᕈᓐᓇᓂᐊᕋᑦᑕ ᐱᒍᑦᔨᓂᐅᒍᓐᓇᑐᓂᓪᓗ ᐃᓱᒪᒃᑯᑦ ᖃᓄᐃᖕᖏᓯᐊᕐᓂᒨᓕᖓᔪᓂᒃ ᐃᓕᓴᕐᓂᓅᓕᖓᔪᓂᓪᓗ ᐃᓄᐃᑦ
ᐅᕕᒐᕐᑐᐃᑦ ᐱᒍᑦᔨᖃᑦᑕᕈᒪᒧᑦ.

ᖃᕐᔪᐃᑦ ᐅᕕᒐᕐᑐᐃᑦ ᑲᑎᒪᔨᖏᑦ ᕿᓚᓈᕐᐸᑐᑦ ᓄᑖᓂᒃ ᐱᓇᓱᖃᑎᑖᕈᓐᓇᓂᕐᒥᒃ ᐱᓇᓱᖃᑎᖃᕈᒪᔪᓂᒃ ᐅᕕᒐᕐᑐᓂᒃ ᓂᐱᖃᕐᕕᖃᕋᓱᐊᕐᑎᓗᒋᑦ ᐃᑲᔪᕐᑎᓴᓂᓪᓗ ᓄᓇᓕᓐᓅᑎᑦᓯᖃᑦᑕᓛᕐᓗᑎᒃ ᐃᑲᔪᕐᑎᓴᓂᒃ 14-ᓄᑦ ᓄᓇᓕᓐᓄᑦ ᓄᓇᕕᒻᒥ ᓯᓵᓯᐱᒥᓪᓗ.

ᔫᑎᑦ ᓇᓗᐃᔪᕐᒥᒃ
ᓄᕗᒻᒥᐅᓄᑦ ᑲᑎᒪᔨ