ᒪᓐᓂᓕᐅᖑᓚᐅᔪᒥ, ᖃᕐᔪᐃᑦ ᐅᕕᒃᑫᑦ ᑲᑎᖕᖓᔨᖏᑦ ᐅᕕᒃᑲᓂᑦ ᐃᓄᒻᒪᕆᓐᓂᓗ ᑲᑎᖃᑎᒌᑦᑎᓯᔪᕕᓃᑦ ᓄᓇᒥ ᐱᕐᖁᓯᑐᖃᕐᓂᒃ ᐱᓇᓱᐊᕐᑎᓯᖃᑦᑕᓱᑎᒃ ᐊᒻᒪᓗ ᐅᒃᑯᐃᓯᑎᑦᓯᓂᖃᕐᓱᑎᒃ ᐅᓂᒃᑲᐅᓯᐅᔪᓂᒃ ᑭᖑᕚᕇᓄᑦ ᐱᐅᓯᐅᓯᒪᔪᓂᒃ, ᐃᓗᕐᕈᓯᑦᑎᓂᒃ, ᐱᕐᖁᓯᑐᖃᑦᑎᓂᒃ ᐊᒻᒪᓗ ᓄᐃᑦᓯᒐᓱᐊᕐᓱᑎᒃ ᐅᖄᕈᑎᖃᕐᓂᑯᑦ ᓱᓀᑦ ᑐᑭᑖᕈᑎᐅᒋᐊᖃᕐᒪᖔᑕ ᓯᕗᒧᐊᕆᐊᓪᓛᕈᑎᑦᓴᓂᑦ ᐊᑕᐅᑦᓯᑯᑦ ᐱᐅᔪᒥᒃ ᓯᕗᓂᑦᓴᓯᐊᖃᕈᒪᓂᕐᒧᑦ.
ᑕᒪᓐᓇ ᐱᕕᑦᓴᓯᐊᕌᓗᒃ ᐊᐱᕐᓲᑎᓂᒃ ᐊᐱᕐᓱᖃᑎᒌᖃᑦᑕᓂᒃᑯᑦ ᐊᑕᐅᑦᓯᑯᑦ, ᐊᒻᒪᓗᒋᐊᓪᓚᖅ ᖃᓂᑕᒌᑉᐸᓕᐊᕈᑎᑦᓴᓯᐊᖑᑦᓱᓂ ᐊᑐᓂ ᖑᕚᖑᔫᓐᓄᑦ.
ᐅᕕᒃᑫᑦ ᐃᓕᑦᓯᐸᓪᓕᐊᔪᑦ, ᑕᒪᑦᓱᒨᓇ ᐱᓇᓱᐊᕐᑕᐅᔪᒧᑦ, ᐱᐅᓯᐅᓯᒪᔪᐃᑦ ᒥᑦᓵᓄᑦ, ᑌᑦᓱᒪᓂ ᐃᓅᑦᔪᓯᕕᓂᕐᓄᑦ, ᐃᓗᕐᕈᓯᒥ ᐱᒻᒪᕆᐅᔪᖁᑎᒋᔭᐅᔪᓄᑦ ᐊᒻᒪᓗ ᐃᓄᐃᑦ ᓲᖑᓂᖏᓐᓄᑦ ᐃᓄᒻᒪᕇᑦ ᐅᓐᓂᒃᑲᐅᓯᖏᓐᓂ ᑐᓵᑦᓱᑎᒃ. ᓱᖃᑦᓯᑎᑕᐅᓂᖃᕐᑐᕕᓃᑦ ᐱᕐᖁᓯᑐᖃᐅᔪᑎᒍᑦ, ᐅᖄᕈᑎᖃᖃᑦᑕᓱᑎᒃ, ᐅᓂᒃᑲᐅᓯᑐᖃᕐᑎᒍᑦ, ᐊᒻᒪᓗ ᐊᓯᒋᐊᓪᓚᖏᓐᓂᑦ, ᐃᑲᔪᕐᓯᒍᒪᓂᖃᕐᓯᒪᒐᑦᑕ ᐅᖄᖃᑎᒌᓐᓂᐅᔪᓂ ᐊᒻᒪᓗ ᐃᓕᑦᓯᐸᓪᓕᐊᑎᑦᓯᓂᕐᒥᒃ ᓱᖃᑦᓯᑎᑦᓯᓂᒃᑯᑦ, ᐱᑐᖃᑎᒌᓐᓂᑯᑦ ᐊᑐᓂ.