2021-ᒥ ᖃᕐᔪᐃᑦ ᐅᕕᒐᕐᑐᐃᑦ ᑲᑎᒪᔨᖏᑦ ᐊᕐᕌᒍᑕᒫᕐᓯᐅᑎᒥᓂᒃ ᑲᑎᒪᓂᒻᒪᕆᖃᓚᐅᔪᕗᑦ ᓯᑦᑎᒻᐸ 28-ᒥᑦ 30-ᒧᑦ, ᓯᓵᓯᐱᒦᑦᓱᑎᒃ. ᐱᓪᓚᕆᐊᓘᑎᓪᓗᒍ ᐊᑑᑎᓚᐅᔪᔭᕗᑦ ᐅᕕᒐᕐᑐᓂᒃ ᓄᓇᕕᒻᒥᐅᓂᒃ ᓄᓇᓕᓐᓂᑦ 14-ᓂᑦ ᐱᓯᒪᔪᓂᒃ ᑯᔩᒃᑯᑦ ᐊᓪᓓᑦ ᐃᓄᐃᓪᓗ ᓄᓇᓕᖓᓅᕐᑎᓯᑦᓱᑕ ᓯᓚᕐᔪᐊᒥ ᖃᓂᒪᓂᒻᒪᕆᖃᕐᓂᖓᓄᑦ ᓯᕗᓂᖅ ᖃᐅᔨᒪᓇᖃᑦᑕᖏᒃᑲᓗᐊᕐᑎᓗᒍ. ᖃᕐᔪᐃᑦ ᐅᕕᒐᕐᑐᐃᑦ ᑲᑎᒪᔨᖏᑦᑕ ᐱᓇᓱᖃᑎᒌᑦᑐᖁᑎᖏᑦ, ᐳᕐᑐᓂᕐᓭᓗ ᑲᑎᒪᔨᖏᓪᓗ ᑕᒪᑐᒥᖓ ᐅᐱᒋᔭᖃᓪᓚᕆᓚᐅᔪᕗᑦ.
ᖃᕐᔪᐃᑦ ᐅᕕᒐᕐᑐᐃᑦ ᑲᑎᒪᔨᖏᑦ ᑎᓕᔭᐅᒪᐅᑎᖃᕐᐳᑦ ᐃᓂᓪᓚᑎᕆᒋᐊᖃᕐᓂᒥᒃ ᑲᑎᒪᓂᒻᒪᕆᐅᒋᐊᓕᒻᒥᒃ ᐊᕐᕌᒍᑕᒫᑦ ᑐᓴᕐᑎᓯᕕᒋᓂᐊᕐᓗᒍ ᐅᖄᕕᑦᓴᕆᓂᐊᕐᓗᒍᓗ ᐊᕐᕌᒍᑕᒫᑦ ᑐᓴᕐᑎᓯᒍᑎᒥᓂᒃ ᑮᓇᐅᔭᓕᕆᐅᑎᕕᓃᓪᓗ ᐊᓪᓚᑕᐅᓯᒪᒍᑎᖏᓐᓂᒃ.
ᐅᕕᒐᕐᑐᓂᒃ ᐃᑦᓯᕙᖃᑎᖃᕐᓗᑎᒃ ᓱᓇᒥᓪᓘᓃᑦ ᐃᔨᕐᑐᐊᖃᕈᓐᓀᓗᑎᒃ ᐱᓇᓱᕝᕕᒥᑕ ᐱᓂᐊᕐᓂᖓᓅᓕᖓᔪᓂᒃ ᓯᕗᓂᑦᑎᓂᓪᓗ ᐱᔭᕆᒍᓐᓇᓯᒍᒪᔭᑦᑎᓂᒃ ᕿᓚᓈᕈᑎᒋᑦᓱᒍ, ᐱᑐᖃᑎᒌᓐᓂᑯᑦ, ᓈᓚᖃᑦᑕᓂᒃᑯᑦ ᐃᓕᑦᓯᕕᖃᖃᑦᑕᓂᒃᑯᓗ ᐊᓯᑦᑎᓂᒃ. ᑌᑲᓂ ᐊᕐᕌᒍᒥ, ᑌᒣᓲᒍᒐᓂ, ᐅᓪᓗᖓ ᑭᖑᓪᓕᐹᒥ ᑲᑎᒪᓂᑦᑕ, ᓇᓪᓕᐅᑎᓚᐅᔪᒻᒥᔪᖅ ᓯᑦᑎᒻᐸ 30-ᒥ ᐅᓪᓗᖁᑎᒧᑦ ᑲᓇᑕᒥ ᓭᒻᒪᐅᑎᒋᐊᖃᕐᓂᒧᑦ. ᐅᐱᓐᓇᑐᒻᒪᕆᐅᓚᔫᖅ ᐅᕕᒐᕐᑐᓄᑦ ᑌᑲᓂ ᐱᓪᓚᕆᐊᓗᒻᒥ ᐅᓪᓗᖁᑎᒥ ᓇᓪᓕᐅᓂᕐᓯᐅᖃᑎᖃᓚᐅᔪᒐᑦᑕ ᐅᕕᒐᕐᑐᓂᒃ, ᓇᓪᓕᐅᓂᕐᓯᐅᕈᑎᖃᕐᓱᑕ ᐃᓕᑕᕐᓇᐅᑎᖏᓐᓂᒃ ᐃᓅᑦᓱᑎᒃ, ᖁᑉᐹᒍᑦᑕᐅᖅ ᑲᑐᑦᔨᖃᑎᒌᖃᑎᖃᓯᒋᐊᕐᓱᑎᒃ ᑯᔩᒃᑯᓂᒃ ᐊᓪᓚᓂᒃ.
ᑲᑎᓕᒫᕐᓱᑎᒃ 30-ᐅᓚᐅᔪᕗᑦ ᐅᕕᒐᕐᑐᐃᑦ ᓄᓇᓕᓐᓂᑦ 15-ᓂᒃ ᑭᒡᒐᑐᕐᑐᑦ ᙯᕐᖁᔭᐅᓯᒪᓚᐅᔪᕗᑦ. ᖃᕐᔪᐃᑦ ᐅᕕᒐᕐᑐᐃᑦ ᑲᑎᒪᔨᖏᑦ ᓇᓪᓕᑳᕐᓯᒪᓚᐅᔫᑦ ᒪᕐᕉᓂᒃ ᐅᕕᒐᕐᑑᓂᒃ ᓄᓇᓕᓐᓂᑦ ᐊᑐᓂᑦ ᐱᓯᒪᔪᓂᒃ. 55 ᐃᓚᐅᒍᒪᐅᑎᒥᓂᒃ ᙯᑦᓯᓯᒪᑎᓪᓗᒋᑦ ᓇᓪᓕᑳᕐᕕᒋᔭᐅᓚᐅᔪᕗᑦ. ᖃᕐᔪᐃᑦ ᐅᕕᒐᕐᑐᐃᑦ ᑲᑎᒪᔨᖏᑦᑕ ᐱᓇᓱᖃᑎᒌᑦᑐᖁᑎᖏᑦ ᐳᕐᑐᓂᕐᓭᓗ ᐊᑐᐃᓐᓇᕈᕐᑎᕆᓯᒪᔪᕕᓂᐅᓚᐅᔪᕗᑦ ᓱᒐᑦᓴᖃᕐᑎᓯᒍᑎᑦᓴᓂᒃ ᐅᖄᖃᑎᒌᒍᑕᐅᔪᑦᓴᓂᓪᓗ ᐃᓚᐅᑦᓯᐊᒥᑎᓪᓗᒋᑦ ᖃᕐᔪᐃᑦ ᐅᕕᒐᕐᑐᐃᑦ ᑲᑎᒪᔨᖏᑦ. ᐃᕐᖃᐅᒪᒐᑦᓴᑖᓚᐅᔪᕗᒍᑦ, ᐆᑦᑐᕋᐅᑎᒋᑦᓱᒍ ᑲᑎᓯᒋᐅᕐᓂᕆᓚᐅᔪᔭᑦᑎᓂᒃ ᐅᑳᕕᐅᑦᓱᑕ ᑯᔩᒃᑯᑦ ᐊᓪᓓᑦ ᐅᕕᒐᕐᑐᐃᑦ ᑲᑎᒪᔨᖏᓐᓄᑦ ᐅᖄᖃᑎᒌᒍᑎᑦᓴᒋᐊᓪᓚᓂᒃ ᓄᐃᑦᓯᓚᐅᔪᒻᒪᑕ, ᓈᓚᑦᓱᑎᓪᓗ ᐅᕕᒐᕐᑐᐃᑦ ᑭᖕᖒᒪᒋᔭᖏᓐᓂᒃ ᐱᓐᓀᓗᑕᕆᓲᒥᓂᓪᓗ ᓄᓇᓕᒥᓐᓂ, ᐱᕐᖁᓯᑐᖃᑦᑎᓂᒃ ᓄᐃᑕᑎᑦᓯᓂᖃᓚᐅᔪᒻᒥᔪᒍᑦ ᑲᑕᑦᔭᑐᖃᕐᑎᓗᒍ ᖁᓪᓕᒥᓪᓗ ᐃᑭᑦᓯᓂᖃᕐᒥᓱᓂ ᐱᒋᐊᕐᓂᖓᓂ ᐊᓯᖏᓐᓂᓗ ᐊᓕᐊᒋᔭᑦᑎᓂᒃ ᐅᖄᔪᖃᖃᑦᑕᓱᓂ ᑲᑎᒪᓂᐊᕈᓯᖃᕐᑎᓯᔪᖃᖃᑦᑕᓱᓂᓗ ᐱᓇᓱᖃᑎᑦᑎᓂᒃ ᙯᕐᖁᓯᒪᔭᑦᑎᓂᓪᓗ.
ᑭᒡᒐᑐᕐᓱᑕ ᐅᕕᒐᕐᑐᓂᒃ ᑭᒡᒐᑐᕐᑎᓕᒫᓂᒃ, ᑲᑎᒪᔨᓂᒃ, ᐳᕐᑐᓂᕐᓴᓂᒃ ᐱᓇᓱᑦᑎᓂᓪᓗ, ᓯᓵᓯᐱᒥᐅᓂᒃ MIGWETCH-ᓚᕗᒍᑦ ᐱᓇᓱᖃᑎᒋᓯᒪᔭᓕᒫᑦᑎᓂᓪᓗ ᐱᓪᓚᕆᐊᓗᒻᒥᒃ ᐊᑑᑎᖃᑎᒋᓚᐅᔪᒐᑦᑎᒋᑦ ᓱᑎᑦᓯᓂᕆᔭᑦᑎᓂᓪᓗ ᓄᐃᑦᓯᖃᑎᒋᑦᓱᒋᑦ ᐃᑲᔪᕐᓯᒪᓂᖏᓐᓄᑦ. ᐅᐱᒍᓱᓪᓚᕆᑉᐳᒍᑦ. ᐃᓄᐃᑦ ᑯᔩᒃᑯᓗ ᐊᓪᓓᑦ ᑕᒪᑐᒥᖓ ᐊᑑᑎᖃᑎᒌᑉᐳᑦ ᐃᓅᓯᐅᑉ ᐊᓐᓂᓇᕐᑑᓂᖓᓄᑦ ᐅᕕᒐᕐᑐᐃᓗ ᓯᕗᓕᕐᑎᒋᓕᕋᑦᑎᒋᑦ ᐅᓪᓗᒥ.