2022 ᖃᕐᔪᐃᑦ ᐅᕕᒃᑫᑦ ᑲᑎᖕᖓᔨᖏᑦ (QYC) ᐊᕐᕌᒍᑕᒫᕐᓯᐅᑏᑦ ᑲᑎᒪᓂᕐᔪᐊᖓᑦ ᐊᑑᑎᓚᐅᔪᖅ ᐊᒥᕃᔭᐅᑦ 28 – 30, ᐃᕗᔨᕕᒻᒥ. ᑲᑎᒪᓂᖃᕐᑎᓗᒋᑦ, ᖃᕐᔪᐃᑦ ᐅᕕᒃᑫᑦ ᑲᑎᖕᖓᔨᖏᑦ ᙯᖁᔨᓯᒪᔪᑦ ᒪᕐᕉᓂᒃ ᐅᕕᒃᑳᓂᒃ ᓄᓇᓕᓐᓂ ᐊᑐᓂ ᐱᓯᒪᔪᓂᑦ ᓄᓇᕕᒻᒥ ᓄᓇᓕᓐᓂᑦ 14-ᓂᑦ ᐊᒻᒪᓗ ᓯᓵᓯᐱᒥ (ᑲᑎᓕᒫᕐᓱᒋᑦ 30 ᐅᕕᒃᑫᑦ) ᑕᕐᕋᓯᓐᓂᐹᒦᑦᑐᒧᑦ ᓄᓇᓕᒻᒧᑦ ᓄᕗᒻᒥ, ᐃᕗᔨᕕᒻᒧᑦ. ᖃᕐᔪᐃᑦ ᐅᕕᒃᑫᑦ ᑲᑎᖕᖓᔨᖏᑦᑕ ᐱᓇᓱᑦᑎᖁᑎᖏᑦ, ᐳᕐᑐᓂᕐᓭᑦ ᐃᓚᐅᑎᓪᓗᒋᑦ ᑲᑎᖕᖓᔩᑦ ᐅᐱᒍᓱᓐᓂᖃᓪᓚᕆᑦᑐᕕᓃᑦ ᑕᒪᓐᓇ ᐊᓂᒎᑎᑦᓯᐊᓂᖓᓄᑦ.
ᖃᕐᔪᐃᑦ ᐅᕕᒃᑫᑦ ᑲᑎᖕᖓᔨᖏᑦ ᑎᓕᔨᒍᑎᓕᐅᕐᓯᒪᔪᑦ ᐃᓂᓪᓚᑎᕆᑦᓱᑎᒃ ᐊᕐᕌᒍᑕᒫᑦ ᑲᑎᒪᓂᕐᔪᐊᖃᖃᑦᑕᓛᕐᓱᑎᒃ ᑕᑯᑦᓴᐅᑎᑦᓯᓂᖃᖃᑦᑕᓗᑎᒃ ᐅᖄᕈᑎᖃᕐᓗᑎᓪᓗ ᐊᕐᕌᒍᑕᒫᑦ ᖃᐅᔨᑎᑦᓯᒍᑎᖏᓐᓂ ᐊᒻᒪᓗ ᑮᓇᐅᔦᑦ ᐋᕐᕿᓯᒪᒍᓯᖏᓐᓂ. ᐊᓯᐊᒍᑦ ᐅᖃᐅᓯᕐᑎᒍᑦ, ᑲᑎᒪᖃᑎᒌᓐᓂᖃᕐᓗᑎᒃ ᐊᑕᐅᑦᓯᑯᑦ ᓱᓕᒐᓗᐊᕐᒪᖔᑦ ᑎᒥᐅᔫᔪᖅ ᐊᒻᒪᓗ ᕿᓚᓈᕐᓂᖃᕐᓂᑯᑦ ᓱᓇᓂᒃ ᓯᕗᓂᕐᒥ ᐊᑑᑎᒍᒪᒻᒪᖔᑕ, ᐱᑐᖃᑎᒌᓪᓗᑕ ᐊᑕᐅᑦᓯᑯᑦ, ᓈᓚᓪᓗᑕ ᐊᒻᒪᓗ ᐃᓕᓐᓂᐊᖃᑎᒌᓪᓗᑕ ᐊᑐᓂᑦᓯᐊᖅ ᐱᓇᓱᐊᕐᓯᒪᔭᑦᑎᓂ ᐊᑦᔨᒌᖕᖏᑐᑎᒍᑦ ᐱᒋᐅᕐᓴᑎᑦᓯᓂᑎᒍᑦ, ᓱᖃᑦᓯᑎᑕᐅᓂᒃᑯᑦ ᐊᒻᒪᓗ ᑕᑯᑦᓴᐅᑎᑦᓯᓂᒃᑯᑦ.
ᐊᒻᒪᓗ, ᑕᒡᒐᓂ ᐊᕐᕌᒍᒥ, ᐊᒻᒪᓗ, ᑭᖑᓂᐊᒍᓪᓗ ᐱᓇᓱᐊᖃᑎᒌᓐᓂᐅᓯᒪᔪ5 ᐊᕐᕌᒍᑕᒫᑦ ᑲᑎᒪᓂᕐᔪᐊᒥ 2021-ᖑᑎᓪᓗᒍ ᓯᓵᓯᐱᒥ, ᐅᐱᒍᓱᓪᓚᕆᑦᓯᒪᔪᒍᑦ ᑐᖕᖓᓱᑦᑎᓱᒋᑦ ᐱᖓᓱᐃᑦ ᑭᒡᒐᑐᕐᑏᑦ ᐊᓪᓚᓂ ᐅᕕᒃᑫᑦ ᑲᑎᒪᔨᖏᓐᓂᑦ (CNYC) ᐃᕗᔨᕕᒻᒧᑦ, ᐁᑐᕆᐊᓐ ᑲᓄ, ᐅᕕᒃᑫᑦ ᐊᖓᔪᕐᖄᒪᕆᖓ ᒥᔅᑎᓯᓂᒥ, ᔪᐊᑕᓐ ᒫᔅᑎ, ᐊᖓᔪᕐᖄᑉ ᑐᖓᓕᐊ ᐅᕕᒃᑫᑦ ᐊᖓᔪᕐᖄᒪᕆᖓᑦ, ᒍᐊᑉᒪᑰᔅᑎᒥᐅᖅ, ᐊᒻᒪᓗ ᑖᓂᐊ ᕆᑦᔅᒪᓐ, ᐱᓇᓱᐊᕋᑦᓴᓄᑦ ᐊᑕᐅᑦᓯᑰᕐᑎᓯᔨ ᕚᓪ ᑐᐊᒥ ᐱᓯᒪᔪᖅ.
ᑕᒪᒃᑯᐊ CNYC ᑭᒡᒐᑐᕐᑎᖏᑦ ᐊᕐᕕᑕᕐᓯᒪᔪᑦ ᐄᔫ ᐃᑦᓰᒥᒃ ᐱᑦᓱᑎᒃ ᐃᕗᔨᕕᒻᒧᑦ ᐃᓚᐅᒋᐊᕐᑐᓱᑎᒃ ᐊᕐᕌᒍᑕᒫᑦ ᑲᑎᒪᓂᕐᔪᐊᑎᓐᓄᑦ. ᑖᓐᓇ ᙯᖁᔨᓯᒪᓂᕗᖅ ᐃᓕᑦᓯᒍᑎᒋᕆᐊᓪᓛᓚᐅᔭᕗᑦ ᐱᓇᓱᐊᖃᑎᒌᒋᐊᓪᓛᖁᓪᓗᑕᓗ ᐊᑕᐅᑦᓯᑯᑦ ᑲᑐᑦᔨᖃᑎᒌᓪᓗᑕ ᐱᓇᓱᐊᕐᓂᑯᑦ ᐊᒻᒪᓗ ᓱᕐᕃᖁᓪᓗᑕ ᐅᕕᒃᑫᑦ ᐱᑦᔪᑎᒋᓗᒋᑦ. ᐱᒻᒪᕆᐊᓘᓚᐅᔪᖅ ᐊᓪᓓᑦ ᐅᕕᒃᑲᖏᑦ ᑲᑎᖃᑎᖃᕐᓱᑎᒃ ᐃᓄᑐᐃᓐᓇᓂᒃ ᐅᕕᒃᑲᓂᑦ ᐃᓕᓐᓂᐊᖃᑎᒌᑦᓱᑎᓪᓗ ᐊᑦᔨᒌᖕᖏᑐᓂ ᐃᓗᕐᕈᓯᖃᖃᑎᒌᖕᖏᓂᒃᑯᑦ ᐱᓇᓱᐊᖃᑎᒌᑦᓱᑎᒃ.
ᐱᒍᑦᔨᓗᒋᑦ ᐅᕕᒃᑲᓕᒫᑦ ᑭᒡᒐᑐᕐᑏᑦ, ᑲᑎᖕᖓᔩᑦ, ᐳᕐᑐᓂᕐᓭᑦ ᐊᒻᒪᓗ ᐱᓇᓱᑦᑏᑦ, ᓇᑯᕐᒦᒪᕆᐊᓗᒃ ᐃᕗᔨᕕᒻᒥᐅᑦ ᐊᒻᒪᓗ ᐱᓇᓱᐊᖃᑎᒋᔭᓕᒫᕗᑦ ᐊᓪᓚᖃᑎᒋᓯᒪᒐᑦᑎᒋ ᑖᑦᓱᒧᖓ ᐱᒻᒪᕆᐊᓗᒻᒧᑦ ᒪᑉᐱᒐᕐᒧᑦ ᐱᓂᐊᕐᓂᑎᓐᓂ ᐊᒻᒪᓗ ᑕᒪᓐᓇ ᑲᑎᒪᓂᒻᒪᕆᒃ ᑲᔪᓯᑦᓯᐊᖁᓪᓗᒍ ᐃᑲᔪᕐᓂᓯ ᐱᑦᔪᑎᒋᑦᓱᒍ ᐊᒻᒪᓗ ᓴᐳᒻᒥᓂᓯ.