ᐊᓕᐊᓇᕐᓯᒪᔪᖅ ᑲᑎᒪᔪᕕᓂᐅᑦᓱᑕ ᐄᔫ ᐃᑦᓰᒥ, ᓂᐳᕌᔅᑲᒥ. ᔦᒥᓯ ᐯ ᐃᓂᒐᓚᖓᓃᑦᑐᖅ. ᑖᕗᖓᖃᑎᐅᓚᐅᕐᓯᒪᕗᖓ ᖃᕐᔪᐃᑯᑦ ᐅᕕᒃᑫᑦ ᑲᑎᒪᔨᖏᓐᓂ ᐃᓘᓐᓈᒍᑦ ᐊᐅᓚᑦᓯᔨᒋᔭᖓᓂᒃ ᑭᐊᔪᓓᓐ ᒪᕐᑎᐊᓪ ᐊᓪᓓᑦ ᐅᕕᒃᑫᑦ ᑲᑎᒪᓂᕐᔪᐊᖓᓄᑦ ᑲᑎᒪᒋᐊᕐᓱᑕ ᐊᓪᓓᑦ ᐅᕕᒃᑲᖏᑦᑕ ᑲᑎᒪᓂᕐᔪᐊᖓᓄᑦ 32-ᒋᔭᖓᓐᓄᑦ ᐊᕐᕌᒍᑕᒫᑦ ᐃᓄᓕᒫᕐᓯᓂᐅᓲᒧᑦ. ᓯᕗᓪᓕᐹᖓᓂ ᐅᓪᓗᒋᔭᖓᓂᑦ, ᓂᐳᕌᔅᑲᖄᕕᓂᕐᒨᓚᐅᕐᓯᒪᔪᒍᑦ ᐅᒥᐊᒃᑰᓱᑕ ᐊᕐᕌᒍᑕᒫᕐᓯᐅᑎᒥ ᐃᓄᓕᒫᕐᓯᓂᖅ ᐊᑑᑎᔪᕕᓂᖅ ᑖᕙᓃᑦᓱᑕ. ᒪᙯᑦᓯᒪᔪᒍᑦ ᐊᒻᒪᓗ ᑲᑎᖃᑎᒌᖃᑦᑕᓱᑕ ᐊᑕᐅᑦᓯᑯᑦ. ᐊᒥᓱᑲᓪᓚᓂᒃ ᑲᑎᒪᐅᑎᖃᕐᓯᒪᔪᒍᑦ ᐊᒻᒪᓗ ᐃᓕᑦᓯᓕᐅᒥᑦᓱᑕ ᑎᒥᐅᔪᖁᑎᒋᔭᖓᓐᓂᑦ ᐊᒻᒪᓗ ᖃᓄᖅ ᐱᓇᓱᐊᕐᓂᖃᓲᖑᒻᒪᖔᑕ. ᓱᓇᓕᒫᑦ ᐱᔭᕇᕐᒪᑕ, ᐁᑦᑐᐃᓯᓚᐅᕐᓯᒪᔪᑦ ᖃᕐᔪᐃᑯᓐᓂ ᐸᐅᑎᒥᒃ ᑎᒥᐅᔪᖁᑎᖓᑕ ᑕᕐᓴᖃᕐᑎᓗᒍ, ᓇᓗᓀᕐᓯᐅᑎᐅᑦᓱᓂ ᐅᕙᒍᑦ ᐃᓅᔪᒍᑦ ᐊᒻᒪᓗ ᐊᓪᓓᑦ ᐊᑕᐅᑦᓯᑯᑦ ᐸᐅᖃᑎᒌᓐᓂᐊᑐᒍᑦ ᓯᕗᓂᕐᒧᑦ ᐅᕕᒃᑫᑦ ᐱᑦᔪᑎᒋᑦᓱᒋᑦ. ᐊᑕᐅᓯᖅ ᐅᕕᒃᑲᖅ ᑐᑦᑐᕙᓚᐅᕐᓯᒪᔪᖅ ᑭᖑᓪᓕᐹᓕᕐᑎᓗᑕ ᐅᓐᓄᖓᓂ ᐊᒻᒪᓗ ᐆᑦᑐᕈᓐᓇᓯᑎᑕᐅᓯᒪᔪᒍᑦ ᑐᑦᑐᕙᒻᒥᒃ ᐁᐸᔪᒥᒃ ᐊᒻᒪᓗ ᐃᒥᓚᐅᕐᓯᒪᔪᖓ ᐊᐅᖓᓂᒃ! ᐊᒥᓱᐊᓗᓐᓄᑦ ᐅᐱᒋᔭᐅᓯᒪᕗᖓ ᐊᒻᒪᓗ ᐃᒥᕇᕋᒪ ᐃᓘᓐᓈᓗᑎᑦ ᐸᑎᑦᑕᓯᓂᐊᓕᕋᒥᒃ. Haha ᓄᓂᕙᕆᐊᕈᓐᓇᓯᓚᐅᕐᓯᒪᔪᒍᑦ ᐅᒥᐊᒃᑰᓱᑕ, ᐃᑯᐊᓚᑦᓱᑕ ᐊᒻᒪᓗ ᓂᕆᓚᐅᕐᓯᒪᔪᒍᑦ ᓂᕿᑲᓪᓚᒥᒃ ᐅᐊᕈᑦᔨᑐᕐᓯᒪᔪᒥᒃ! ᑐᑦᑐᕙᒻᒥᒃ ᖃᔪᕐᑐᒍᓐᓇᓯᓯᒪᔪᒍᑦ ᐆᔪᑲᓪᓚᓕᓐᓂᒃ. ᖃᔪᓕᐅᕈᓯᖓᑦ ᖃᔪᓕᐅᕈᓯᑦᑎᓄᑦ ᐊᑦᔨᐸᓱᖃᑐᐃᓐᓇᑐᖅ ᑌᒣᑦᓱᒍ ᐊᓂᕐᕋᒦᑦᑑᔮᕐᓯᒪᕗᖓ. ᑲᑎᒪᓚᐅᕐᓯᒪᔪᒍᑦ ᖃᕐᒪᑲᓪᓚᒥᒃ. ᑭᐊᔪᓓᓐᓗ ᐅᕙᖓᓗ ᓇᔪᕐᕕᖃᓚᐅᕐᓯᒪᔪᒍᑦ ᖃᕐᒪᕗᓐᓂᒃ ᐊᑦᑕᑐᕐᑕᐅᓚᕿᓯᒪᔪᒥᒃ ᐅᕙᑦᑎᓄᑦ. ᑲᑎᓯᓚᐅᕐᓯᒪᔪᒍᑦ ᐃᓄᑦᓯᐊᐸᐅᔮᓗᓐᓂᒃ ᐅᕕᒃᑲᓂᒃ ᐊᒻᒪᓗ ᐃᓄᒻᒪᕆᓐᓂᒃ ᑖᕙᓃᓐᓂᓕᒫᑦᑎᓂ ᐊᒻᒪᓗ ᐊᐱᕐᓱᕈᓐᓇᓯᕆᐊᓪᓚᓇᖕᖏᑐᖅ ᓱᓇᒋᐊᓪᓚᒥᒃ!!!! ᐱᖓᓱᐃᑦ ᐊᓪᓓᑦ ᐅᕕᒃᑫᑦ ᑲᑎᒪᔨᖏᑦ ᑎᑭᓛᕐᓂᐊᑐᑦ ᐊᕐᕌᒍᑕᒫᑦ ᑲᑎᒪᓂᒋᓲᑦᑎᓄᑦ ᐃᕗᔨᕕᒻᒧᑦ ᓯᑉᑎᒻᐱᕆ 2022 ᓈᓂᖓᓂ. ᓂᕆᐅᓐᓂᖃᕐᑐᒍᑦ ᓯᕗᓂᕐᒥᒃ ᐱᓇᓱᐊᖃᑎᒌᖃᑦᑕᓛᕆᐊᑦᑎᓂᒃ ᑌᒣᓘᒐᓚᓪᓗᑕ!
ᐊᓕᐊᓇᕐᑐᐸᐅᔮᓘᓚᐅᕐᑐᖅ ᑐᖕᖓᓇᕐᑐᑲᓪᓚᐅᓱᑎᓗ ᐊᓪᓓᑦ! ᓇᑯᕐᓴᓯᐊᓕᓚᐅᕐᖁᖓ ᐁᔪᕕᓂᐅᒋᐊ ᑲᑎᖕᖓᓂᕐᔪᐊᑎᓪᓗᒋᑦ ᓂᒥᐊᔅᑲᒥ!
ᓲᓯᐋᓐ ᑲᓪᓚᒃ
ᑐᖓᓕᐊᓄᑦ ᐊᖓᔪᕐᖄᕆᔭᐅᓚᐅᔪᖅ ᖃᕐᔪᐃᑦ ᐅᕕᒃᑫᑦ ᑲᑎᒪᔨᖏᓐᓄᑦ