ᐃᑕᐅᔪᑦ N° 11
ᐅᓗᒃ ᐃᓅᑉ ᓴᓇᕐᕈᑎᖓ ᐊᒻᒪᓗ ᐊᓈᓇᒐᓂᒃ ᑕᑯᓐᓇᖃᑦᑕᓯᒪᔪᖓ ᐊᑦᔨᒌᖕᖏᑐᓂᒃ ᐅᓗᓐᓂᒃ ᐊᑐᕐᑎᓗᒍ ᓇᐅᑐᐃᓐᓇᓂᒃ ᐱᓇᓱᐊᕐᓱᓂ. ᒥᑭᔪᒥᒃ ᐅᓗᒻᒥᒃ ᐊᑐᕐᓯᒪᔪᖅ ᐃᓕᑦᑎᓱᓂ ᕿᓯᔭᒻᒥᒃ ᑲᒥᑦᓵᓂᒃ. ᐊᖏᔪᒥᒃ ᐅᓗᒻᒥ ᐊᑐᕐᓯᒪᔪᖅ ᕿᑦᓯᕆᒍᑎᖃᕐᓱᓂ ᐳᐃᔨᐅᑉ ᐊᒥᖓᓂᒃ ᐊᒻᒪᓗ ᓈᒻᒪᑐᒥᒃ ᐅᓗᒻᒥᒃ ᐊᑐᕐᑎᓗᒍ ᓂᕿᑐᐃᓐᓇᒥᒃ ᐊᕕᐅᕐᙯᑎᓪᓗᒍ ᓂᒃᑯᓕᐅᕐᓱᓂᓗ. ᐱᑦᔪᑎᖓ: ᐅᓘᑉ ᒥᑭᔫᑉ ᑮᓇᖓᑦ ᓵᑦᑑᒋᐊᖃᕐᓯᒪᔪᖅ ᐃᐱᑦᓴᓯᒪᓂᖓ ᐊᒥᕐᒥᒃ ᐊᕕᑦᑐᐃᓚᖓᓕᑐᐊᕋᒥ. ᐊᖏᓂᕐᓴᖅ ᐅᓗᒃ ᐃᐱᑦᑑᒋᐊᖃᕐᓯᒪᔪᖅ ᐊᒻᒪᓗ ᐃᐱᑦᓴᓯᒪᑦᓯᐊᓗᒍ ᑭᓛᕆᖁᓇᒍ ᕿᑦᓯᕆᓕᑐᐊᕋᕕᑦ ᐳᐃᔨᐅᑉ ᐅᕐᓱᖓᓂᒃ. ᕿᑦᓯᕆᓕᑐᐊᕋᕕᑦ ᐊᒻᒪᓗ ᐊᓕᑦᓯᑲᓪᓚᑐᐊᕈᕕᑦ ᐊᒥᕐᒥᒃ ᒥᕐᓱᑲᐱᒋᐊᓕᒃ, ᑌᒣᒻᒪᑦ ᒥᕐᖁᑎᙯᓐᓇᕆᐊᖃᕐᖁᑎᑦ. ᐅᓗᐃᑦ ᑲᒪᒋᔭᐅᑦᓯᐊᓚᕆᒋᐊᓖᑦ. ᓴᓗᒻᒪᓴᕆᐊᖃᖕᖏᑐᑦ ᐆᓇᕐᑐᒧᑦ ᐃᒪᕐᒧᑦ, ᐆᓇᕐᑐᖅ ᐃᒪᖅ ᑭᑭᐊᑦᓴᔭᖓᓂᒃ ᐃᒃᑮᓖᓲᖅ. ᓴᓗᒻᒪᖃᑦᑕᕆᐊᓖᑦ ᐊᑐᕇᕐᓂᑕᒫᑦ. ᑭᑭᐊᑦᓴᔭᖅ ᒪᖕᖏᕈᕐᑎᑌᓕᓪᓗᒍ ᐃᐳᖓᑕ ᑭᑭᐊᖓᓃᑦᑐᖓ ᐳᐃᔨᐅᓪᓗ ᕿᓚᓗᒐᐅᓪᓗ ᐅᕐᓱᖓᓄᑦ. ᐃᓚᖏᑦ ᐊᕐᓀᑦ ᓴᓗᒻᒪᓭᓲᑦ ᐅᓘᑉ ᑭᑭᐊᑦᓴᔭᖓᓂᒃ ᐃᒥᕋᕐᒧᑦ ᑭᓂᑦᓯᑎᑦᓱᒍ. ᐊᕐᓀᖅ ᑕᓪᓕᒪᓂᒃ ᐅᖓᑖᓄᓪᓘᓃᑦ ᐅᓗᖃᕈᓐᓇᑐᑦ ᐊᑦᔨᒌᖕᖏᑐᓄᑦ ᐊᑑᑎᖃᕐᑎᓗᒋᑦ ᐊᑐᓂ. ᐊᖑᑏᑦ ᐃᐱᑦᓭᒍᓐᓇᑐᑦ ᐊᕆᐊᕐᒧᑦ ᑮᓇᖓᓂᑦ. ᐊᐱᑦᓭᓗᓂ ᐊᕆᐊᖅ ᖁᒻᒧᓕᖓᒋᐊᓕᒃ ᐅᓗᒻᒥᒃ ᐊᑐᓕᕈᓂ. ᖃᐅᔨᒪᔭᐅᒋᐊᓕᒃ: ᓇᑯᕐᒦᒍᒪᕗᖓ ᓗᐃᓴ ᑯᑭ ᐳᕋᐅᓐᒥᒃ ᐃᑲᔪᕐᓯᒪᒻᒪᑦ
ᐱᐊᑦᓯ ᑐᑲᓗᒃ ᑎᒡᒍᐊᑕᐅᓯᒪᔪᖅ ᖃᕐᔪᐃᑦ ᐅᕕᒃᑫᑦ ᑲᑎᒪᔨᖏᓐᓄᑦ
