ᓄᐃᑕᐅᔪᑦ N° 10

ᑭᓇᒃᑰᕕᑏᒃ ᖃᖓᓗ ᑲᑕᑦᔭᓯᓲᒍᓯᓐᓂᕿᑎᒃ ᖃᖓᓗ ᕿᓚᐅᑦᔭᓱᑎᓪᓗ ᑖᓂᓯᓲᒍᓯᓐᓂᕿᑎᒃ ?
ᔮᓇᓯ ᐹᓴᓐ ᓵᓐᑎ ᐃᒪᕐᓚᓗ ᑰᑦᔪᐊᒥᐅᒃ ᓄᓇᕕᒻᒥ ᑯᐯᒃᒥ. ᔮᓇᓯ ᐱᒋᐊᕐᑐᕕᓂᖅ
ᓯᑕᒪᐅᔪᖕᖏᒐᕐᑐᓂᒃ (7) ᐅᑭᐅᖃᕐᓱᓂ ᑰᑦᔪᐊᒥᐅᑦ ᐅᕕᒐᕐᑐᖁᑎᖏᓐᓄᑦ
ᐃᓚᐅᑦᓱᓂ ᐃᓂᓪᓚᑎᕐᑕᐅᓯᒪᓲᓄᑦ ᒥᐊᔨ ᐁᑦᓯᓴᓐᒧᑦ ᐃᓚᐅᓲᒍᖏᓐᓈᓱᓂᓗ ᑖᒃᑯᓄᖓ
ᐃᓕᓭᔨᖕᖑᓯᒪᓕᕐᒥᓱᓂ. ᓵᓐᑎ ᑲᑕᑦᔭᖃᑎᖃᕆᐊᖕᖓᖃᑦᑕᓯᒪᔪᖅ ᔮᓇᓯᒥᒃ 2018-ᒦᑦᓱᑕ
ᕿᓚᐅᑦᔭᕆᐊᖕᖓᖃᑦᑕᓯᒪᑎᓪᓗᒍᓗ ᐊᕐᕌᒍᓕᒫᖅ ᓈᓕᕐᑐᖅ ᐃᓚᐅᓯᒻᒥᓱᓂ ᑰᑦᔪᐊᒥᐅᑦ
ᐅᕕᒐᕐᑐᖁᑎᖏᓐᓄᑦ ᐃᓕᓭᔨᖕᖑᒥᑦᓱᓂᓗ.

ᐱᖕᖑᐊᑎᐅᖃᑎᖃᓲᒍᕕᑏᒃ ? ᑐᐊᕈᑦᑎᒃ, ᓱᓇᒥᒃ ᑌᔭᐅᒍᓯᖃᕐᐸᑦ ?
ᐊᐅᑲ, ᐅᕙᖓᓗ ᓵᓐᑎᓗ ᑖᒃᑯᑑᕗᒍᒃ.

ᐃᒫᙰᓚᒍᑎᑦᓴᖃᕐᐲᑦ ᐅᕕᒐᕐᑐᓄᑦ ᑲᑕᑦᔭᕆᐅᕈᒪᔪᓄᑦ ᕿᓚᐅᑦᔭᕆᐅᕐᓴᕈᒪᔪᓄᓪᓗ ?
ᒍᓐᓇᕈᑦᓯ, ᑲᑕᑦᔭᕆᐅᕐᓴᐸᒋᑦᓯ ᕿᓚᐅᑦᔭᕆᐅᕐᓴᐸᓪᓗᓯᓘᓐᓃᑦ. ᑲᔪᓯᑎᑦᓯᒍᓐᓇᓂᐊᕋᑦᑕ
ᐃᓕᕐᖁᓯᑦᑎᓂᒃ ᓲᖑᔫᑎᑦᓯᐊᓗᒍ ᐃᓄᐃᑦ ᐱᕐᖁᓯᑐᖃᖓᑎᒍᑦ ᑭᖑᕚᕇᓄᑦ. ᓵᓐᑎᑎᑐᑦ
ᐅᕙᖓᑎᑐᓪᓗ, ᐊᕐᕕᑕᖃᑦᑕᕈᓐᓇᕋᔭᕐᑐᓯ ᓇᒧᑐᐃᓐᓇᖅ ᑕᑯᓐᓇᐅᔮᕐᑕᐅᒋᐊᕐᑐᓗᓯ
ᓯᓚᕐᔪᐊᒥᐅᒍᖃᑎᑦᓯᓄᑦ ! ᐱᓇᓱᒍᑦᔨᓂᕐᒧᑦ ᐊᖏᖃᑎᒌᒍᑎᑎᒍᑦ ᐱᓇᓱᑦᑎᑕᐅᖃᑦᑕᓗᓯ
ᐳᓛᕆᐊᕐᓯᒪᔪᑦ ᑎᑭᑐᐊᕐᐸᑕ ᓄᓇᓕᑦᓯᓄᑦ. ᑕᑯᓐᓇᐅᔮᕈᒪᓲᑦ ᐱᕐᖁᓯᑐᖃᓕᕆᔪᓂᒃ
ᐊᑦᔨᒌᖕᖏᑐᓂᒃ ᐃᓕᕐᖁᓯᓕᓐᓂᒃ. ᑲᖕᖑᓱᓲᒍᔪᖃᕋᓗᐊᕈᓂ ᓯᕘᕋᓲᒍᔪᖃᕋᓗᐊᕈᓂ
ᖃᓄᐃᖕᖏᑐᖅ. ᐃᓱᕐᕆᓯᕙᓪᓕᐊᑐᐃᓐᓇᓇᕐᑐᖅ ᐅᐱᒋᔭᐅᔪᖃᖃᑦᑕᓱᓂ ᑕᑯᓐᓇᑎᑦᓯᔪᖃᕐᓱᓂ
ᐃᓄᐃᑦ ᐃᓕᕐᖁᓯᖓᑎᒍᑦ ᐱᖕᖑᐊᑐᖃᓕᕋᒥ. ᐱᒍᓐᓇᐳᓯ ! ᓴᐳᑦᔨᓚᖓᕗᒍᑦ!
ᐱᒍᓐᓇᐳᓯ, ᐱᒍᓐᓇᓯᓯᒪᒻᒥᒐᑦᑕᓕ ! ᐅᐱᒋᓗᒍ ᐃᓄᐃᑦ ᐃᓕᕐᖁᓯᖓ ᓲᖑᔫᑎᑦᓯᓯᐊᓚᐅᕐᑕ
ᑕᑯᓐᓇᐅᔮᕐᑕᐅᓂᕆᓲᑦᑎᓂᒃ ᑲᑐᑦᔨᓗᑕ !

ᐊᓯᖏᓐᓂᒃ ᐃᓕᕐᖁᓯᕐᒨᓕᖓᔪᓂᒃ ᐱᓇᓱᐊᓲᒍᒋᕕᑎᒃ ᑲᑕᑦᔭᓂᑐᐃᓐᓇᐅᖏᑦᑐᒥᒃ
ᑖᓂᓯᕐᓂᑐᐃᓐᓇᐅᖏᑦᑐᒥᓪᓗ ?
ᔮᓇᓯ ᓇᒻᒥᓂᕐᒥᓂᒃ ᐱᓇᓱᖃᒐᕐᕕᓕᒃ ᑌᔭᐅᒍᓯᓕᒻᒥᒃ Yaya Inspirations ᓯᐅᑎᒻᒥᐅᑕᓕᐅᓲᖅ
ᐃᓄᐃ ᐃᓕᕐᖁᓯᖓᓅᓕᖓᔪᓂᒃ ᓯᐅᑎᒻᒥᐅᑕᓕᐅᕐᐸᓱᓂ ᕿᑐᒪᕐᓵᔭᓂᒃ, ᕿᓯᔭᓂᒃ,
ᑎᕆᒐᓐᓂᐊᔭᓂᓪᓗ. ᓴᓇᒻᒪᓕᐅᕙᓪᓗᓱᒋᑦ ᐅᓗᖕᖑᐊᓂᒃ ᐃᓚᒋᐊᖃᑦᑕᓱᒋᑦ ᑐᓐᓂᖑᐊᓂᒃ.
ᓂᐅᕐᕈᑎᒋᕙᑦᓱᒋᑦ Instagram-ᑎᒍᑦ ᐱᓇᓱᒐᖃᕐᕕᖓ Yaya Inspirations 4,000
ᐅᖓᑖᓅᕐᑐᓄᑦ ᑕᑯᒋᐊᕐᑕᐅᓯᒪᓕᕐᑐᑦ ᓄᓇᕐᔪᐊᓂᑦ ᐊᑦᔨᒌᖕᖏᑐᓂᑦ ᖃᕆᑕᐅᔭᒃᑯᑦ
ᑐᓴᕋᑦᓴᖃᕐᕕᓴᒥᒃ ᓄᐃᑦᓯᕙᓪᓕᐊᓛᓕᕐᒥᔪᖅ.

ᓵᓐᑎ ᓯᐅᑎᒻᒥᐅᑕᓕᐅᓲᒍᒻᒥᔪᖅ ᑕᑯᖃᑦᑕᓯᒪᑦᓱᓂ ᐱᕐᖁᓯᑐᖃᖓᑎᒍᑦ ᐃᓄᐃᑦ
ᕿᓚᐅᑦᔭᕈᑎᓕᐊᒍᓯᒪᔪᒥᒃ. ᕿᔪᒻᒥᑦ ᕿᑐᒪᕐᓵᓴᔭᒥᓪᓗ ᐊᑦᔨᓯᐊᖓᓂᒃ ᐃᓄᐃᑦ
ᕿᓚᐅᑦᔭᕈᑎᓕᐊᕆᓲᕆᓯᒪᔭᖓᑕ ᕿᓚᐅᑦᔭᕈᑎᖕᖑᐊᕌᐱᐅᔮᑦᓯᐊᑐᓂᒃ.

ᑐᓴᐅᒪᔭᐅᖁᔨᕖᑦ ᓱᓇᑐᐃᓐᓇᒥᒃ ᓄᓇᕕᒻᒥᐅᓄᑦ ᐅᕕᒐᕐᑐᓄᑦ ?
ᒪᓐᓇ ᑐᓴᐅᒪᔭᑐᕆᔭᑦᓭᑦ ᐊᒥᓱᕕᑦᓱᒍᐊᓪᓛᑦ ᑭᓇᑐᐃᓐᓇᑯᓐᓂᑦ ᑭᓯᐊᓂ ᓱᓪᓕᑕᐅᔪᖅ !
ᐱᓂᕐᓗᑌᓕᑦᓯᐊᐸᒋᑦ ! ᐃᓕᓴᕆᐊᖃᕐᓃᑦ ᐃᑉᐱᒋᔭᑐᐊᕆᒍᒃ, ᖃᐅᔨᓴᕐᐸᓗᑎᑦ ᐱᕕᑦᓴᓯᐅᕐᐸᓗᑎᑦ
ᐅᑕᕐᕿᑐᐃᓐᓇᕈᓐᓀᓗᑎᑦ ! ᐱᕕᑦᓴᑖᕈᕕᑦ ᑲᔪᓯᑦᓯᐊᕆᑦ ! ᖃᐅᔨᒪᓇᖕᖏᒪᑦ ᖃᐅᑉᐸ
ᓱᓇᑕᖃᓛᓕᕐᒥᒪᖔᑦ. ᐃᒻᒥᓂᒃ ᑲᒪᒋᑦᓯᐊᕆᑦ. ᐱᒍᓐᓇᐳᑎᑦ !

ᔮᓇᓯ ᐹᓴᓐᒥᑦ ᓵᓐᑎ ᐃᒪᕐᓚᒥᓪᓗ