ᓄᐃᑕᐅᔪᑦ N° 10

ᐁ, ᐋᓕᓴᓐ ᒥᐊᓲᕗᖓ, 27-ᓂᒃ ᐅᑭᐅᖃᕐᓱᖓ. ᑰᑦᔪᐊᒥᐅᒍᑦᓱᖓ. ᒪᕐᕉᓂᒃ
ᕿᑐᕐᖔᐱᖃᕐᓱᖓ. ᐊᒥᓱᓂᒃ ᐱᓇᓱᐊᕆᐊᒥᒃ ᐊᓕᐊᒋᔭᖃᕐᐳᖓ, ᐊᓕᐊᒋᔭᕐᒪ ᐃᓚᖓᑦ
ᐱᕐᖁᓯᑐᖃᑦᑎᒍᑦ ᑐᓐᓂᓕᐅᕈᓐᓇᓂᖅ. ᐃᓅᓯᓕᒫᕐᓂ ᐊᓕᐊᒋᔭᕐᑖᕆᓂᐊᕐᑐᕆᓯᒪᖕᖏᑕᕋ ᑕᒪᓐᓇ.
ᐱᒋᐊᕐᓯᒪᔭᕋ ᑕᒪᓐᓇ ᑫᓪᓚᑐᕐᑕᐅᓱᖓ ᖃᐅᔨᒻᒫᕆᔭᐅᓪᓚᕆᑦᑐᒧᑦ ᐱᐅᓕᐊᕆᐊᑦᓯᐊᓯᒪᔪᒥᒃ
ᑐᓐᓂᓕᐅᕈᓐᓇᓂᕐᒥᒃ, Hovak Johnston-ᒧᑦ. ᒪᓐᑐᕆᐊᓪᓕᐊᓚᐅᕐᓯᒪᑎᓪᓗᒍ
ᐊᕐᕌᒍᑦ ᐊᒥᓲᖕᖏᑐᑦ ᓈᓕᕐᑐᑦ ᑐᓐᓂᓕᐅᕐᓂᒋᐊᕐᑐᓱᓂ ᐃᓕᓵᓂᒃ ᐃᓕᓴᕐᑐᓂᒃ
ᓄᓇᕕᒃ ᓯᕗᓂᑦᓴᕗᑦ, ᑲᑎᓚᐅᕐᓯᒪᓂᐊᕐᑐᕆᓯᒪᖕᖏᑕᕋ ᑖᓐᓇ ᐱᓯᑎᒻᒪᕆᒃ ᐊᕐᓇᖅ,
ᑕᑯᓐᓇᕆᐊᕐᑐᖁᔭᐅᓚᐅᕐᓯᒪᔪᖓ ᐳᐃᒍᓚᐅᕐᓯᒪᓂᐊᕈᓐᓀᑕᕐᓂᒃ. ᑐᓐᓂᓕᐅᕐᓂᓚᐅᕐᓯᒪᔪᖅ
ᐃᓚᓐᓈᓃᕙᖓ ᐊᓇᕐᕋᒥᓂ ᐊᖑᑎᒋᓯᒪᔭᖓᓂᓪᓗ ᑐᓐᓂᓕᐅᕐᑎᒥᑦᓱᒍ. ᑭᖑᓂᐊᐱᖓᒍᑦ,
Hovak ᑐᓐᓂᓕᐅᕐᓂᓯᓚᐅᕐᓯᒪᒻᒥᔪᖅ ᐊᖓᔪᓐᓃᕙᖓ/ᓄᑲᕐᓃᕙᖓ ᑮᓇᖓᒍᑦ.
ᑐᓐᓂᓕᐅᕐᑎᐅᒍᒪᓯᓚᐅᕐᓯᒪᔪᖓ ᑌᑰᓇ. ᐅᕙᓐᓄᑦ ᐃᓅᓯᒃᑯᑦ ᐃᑉᐱᓂᐊᕐᓇᓚᕆᑦᓯᒪᔪᖅ.
ᓚᒍᒪᒻᒥᓱᖓᓗ ᖃᐅᔨᒻᒫᕇᓪᓚᕆᖕᖏᑐᒍᒃ Hovak-ᓗ, ᐅᕙᓐᓂᓘᓐᓃᑦ ᖃᐅᔨᒪᔪᑦᓴᐅᖏᒻᒥᔪᖅ
ᑭᓯᐊᓂ ᖃᕆᑕᐅᔭᒃᑯᑦ ᑐᓴᐅᒪᖃᑎᒌᑦᑎᓯᕕᖓᓂᒃ ᑕᑯᒋᐊᑲᑦᑕᓲᒍᔪᖓ ᐊᓯᖏᓪᓗ
ᐊᒥᓱᑦ ᐃᓄᐃᑦ ᐱᕐᖁᓯᑐᖃᒃᑯᑦ ᑐᓐᓂᓕᐅᕐᑎᐅᓲᑦ ᑲᔪᓯᒍᑎᒋᓲᒃᑲ. ᐃᓕᑦᓯᓚᕆᑦᓯᒪᔪᖓ
ᐊᕐᓇᓯᐊᒻᒪᕆᐅᑦᓱᓂ ᐱᓯᑎᕐᔪᐊᒍᑦᓱᓂᓪᓘᑐᒥᑦ ᐃᓚᓐᓈᕋᓂᑦ, ᐊᕐᓴᓂᒃ ᑎᐊᒥᒃ
ᑐᓐᓂᓕᐅᕐᑎᐅᖃᑕᐅᓲᒥᑦ ᐱᐅᓕᐊᕐᑎᐅᖃᑕᐅᔪᒥᒃ ᐱᕐᖁᓯᑐᖃᒃᑯᑦ ᑐᓐᓂᓕᐅᖃᑦᑕᓂᕐᒥᒃ.
ᑌᓐᓇᑕᒐ ᑫᓪᓚᑐᐃᔨᒋᓯᒪᔭᕋ ᐅᖄᕕᑦᓴᕆᓲᕆᑦᓱᒍᓗ ᑐᓐᓂᓕᐅᕐᑎᐅᓂᕐᒥᒃ ᐱᓇᓱᐊᓕᕐᑎᓗᖓ.
ᑐᓐᓂᓕᐅᕐᑎᐅᓯᒋᐊᕐᓯᒪᔪᖓ ᐊᕐᓴᓂᕐᒧᑦ ᑐᓐᓂᓕᐅᕐᑕᕕᓂᐅᑦᓱᖓ ᖁᕐᑐᕋᒃᑯᑦ, ᐃᒻᒥᓂᒃ
ᑐᓐᓂᓕᐅᑫᓐᓈᐱᑦᑎᑕᐅᑦᓱᖓ ᐱᒋᐅᕐᓴᑎᑕᐅᕌᐱᑫᓐᓇᓱᖓ. ᐱᔭᕇᕋᓐᓄᒃ ᐃᑲᔪᓯᑦᓱᓂ
ᑎᑭᓭᓚᖓᓯᒐᒪ ᐱᓇᓲᑎᑦᓴᓃᕙᖓ ᑌᒪ ᐱᒋᐅᕐᓴᕕᒋᖃᑦᑕᓂᐊᓕᕋᒃᑭᑦ ᐊᖓᔪᒃᑲ/ᓄᑲᒃᑲ,
ᒍᒪᑦᓯᐊᖃᑦᑕᓂᖏᓐᓄᑦ ᑕᑎᖃᕈᓐᓇᓂᖏᓐᓄᓗ ᐅᕙᓐᓂᒃ ᐱᒋᐅᕐᓯᒪᕗᖓ. ᐊᕐᕌᒎᒃ
ᒪᕐᕉᑐᐃᓐᓇᕆᐊᓖᒃ ᓈᓕᕐᑐᑦ ᐱᒋᐊᓚᐅᕐᓯᒪᑎᓪᓗᖓᓂᑦ, ᐅᓪᓗᒥᒧᑦ ᐊᕙᑎᐅᑐᐃᓐᓇᕆᐊᓕᓐᓂᒃ
ᑐᓐᓂᓕᐅᕐᓯᒪᓕᕐᑐᖓ. ᐃᑭᑦᑑᔮᕐᑑᒐᓗᐊᑦ ᑭᓯᐊᓂ ᑕᒪᑐᒥᖓ ᐱᓇᓱᐊᓕᕐᓱᖓ
ᓇᓘᒻᒥᓯᒪᑫᓐᓇᓯᒪᔪᖓ ᑲᔪᓯᔪᑦᓴᐅᒪᖔᕐᒪ. ᓴᐳᑦᔭᐅᓯᒪᑦᓯᐊᕋᒪ ᐃᓚᓐᓈᓅᕙᖓ ᐃᓚᓐᓅᕙᖓᓗ
ᑲᔪᓯᑦᓯᐊᕈᓐᓇᓯᒪᔪᖓ. ᑌᒪᖕᖓᑐᐃᓐᓇᖅ ᑐᓐᓂᓕᐅᕆᓲᒍᖕᖏᑐᖓ ᐅᓪᓗᑕᒫᒍᖕᖏᑐᕐᓗ,
ᑐᓐᓂᓕᐅᕆᓲᒍᔪᖓ ᓭᒪᑦᓯᐊᓕᑐᐊᕋᒪ ᐃᓱᕐᕆᓯᐊᓕᑐᐊᕋᒪᓗ ᓇᔪᕐᑕᓃᕙᖓ ᐃᒻᒥᓂᓪᓗ
ᓭᒪᕕᖃᑦᓯᐊᓕᑐᐊᕋᒪ. ᓯᕗᓂᕐᒥ ᖃᒻᒥᑯᑦ ᑐᓐᓂᓕᐅᕐᓂᖃᑦᑕᓛᕈᒪᔪᖓ, ᐃᓅᖃᑎᒃᑲ ᐃᓚᒋᓗᒋᑦ
ᑐᓐᓂᓕᐅᕐᑎᐅᖃᑎᒋᓲᒃᑲ. ᐃᓕᕐᖁᓯᑦᑎᓄᑦ ᐱᑐᑦᓯᒪᓂᕐᓴᐅᔮᓕᕐᑐᖓ ᐱᕐᖁᓯᑐᖃᑎᒍᑦ
ᑐᓐᓂᓕᐅᓲᒍᓕᑐᐊᕋᒪ. ᑕᓕᒃᑯᑦ ᑐᓐᓂᓕᐅᕐᑕᐅᓯᒪᒻᒥᔪᖓ ᐱᕐᖁᓯᑐᖃᑦᑎᒍᑦ ᐳᑦᔪᑯᑦ, ᑮᓇᒃᑯᑦ
ᖁᕐᑐᕋᒃᑯᓗ. ᐱᕈᕐᓴᓱᖓ ᑕᑯᓚᐅᕐᓯᒪᓯᒪᖕᖏᑐᖓ ᐊᕐᓇᓂᒃ ᑐᓐᓂᓕᐅᕐᑕᐅᓯᒪᔪᓂᒃ. ᐅᓪᓗᒥ
ᑕᑯᑦᓴᐅᓂᕐᓴᐅᓲᒍᓕᕐᑐᑦ ᑐᓐᓂᓖᑦ ᖃᓄᐃᒋᔭᐅᒍᓐᓀᓂᕐᓴᐅᓱᓂᓗ. ᐅᐱᒍᓱᑐᐃᓐᓇᓲᒍᓚᖓᕗᖓ
ᐃᓄᑑᐃᓐᓇᐅᒋᐊᒥᒃ ᐱᐅᓕᐊᕆᐊᑦᓯᐊᐸᓪᓗᖓᓗ ᓯᕗᓕᑦᑕ ᑎᒍᔨᕕᐅᒍᑎᒋᓯᒪᔭᖏᓐᓂᒃ.
ᐋᓕᓴᓐ ᒥᐊᓱ