ᑲᑎᖕᖓᔨᓄᑦ ᐊᖓᔪᕐᖄᖑᓚᐅᕐᑐᓚᐅᔪᒐᒪᓂᑦ, ᐊᒥᓱᓂᑦ ᐊᑦᓱᕈᕐᓇᑐᓂᒃ ᐊᑑᑎᓯᒪᔪᒍᑦ. ᓂᕆᐅᓇᖕᖏᑐᓂᒃ ᐊᑑᑎᖃᑦᑕᑐᕕᓂᐅᑦᑐᑕ ᐅᑉᐱᕆᔭᖃᕈᓐᓀᓯᒪᔪᐃᓐᓇᐅᔪᒍᑦ ᑲᑎᖕᖓᔨᐅᖃᑎᕗᓐᓂᑦ. ᐅᓪᓗᒥ, ᐊᑯᓂ ᐅᑕᕐᕿᔭᕕᓂᕆᑦᓱᒍ, ᐱᒍᓐᓇᓯᓯᒪᔪᕆᓪᓚᕆᑦᑐᖓ ᓄᐃᑦᓱᒍ ᐱᐅᓂᕐᓴᖅ ᑲᑎᖕᖓᔩᑦ ᑭᖕᖒᒪᒋᔭᖓ ᐅᕕᒐᕐᑐᐃᑦ ᐱᐅᔪᒧᑦ ᐊᑦᑐᐊᔭᐅᒋᐊᖃᕐᒪᑕ. ᐱᒍᒪᔭᕗᑦ, ᓂᕆᐅᓐᓂᖃᕈᑎᕗᑦ ᑭᖕᖒᒪᒋᕗᓪᓗ ᑖᒃᑯᓭᓐᓇᐅᖏᓐᓇᑐᑦ, ᐱᓇᓱᐊᕈᑎᒋᓪᓚᕆᖃᑦᑕᓕᕐᓱᒋᓗ ᐱᓇᓱᐊᖃᑎᒌᑦᓱᑕ ᐅᕕᒐᕐᑐᐃᑦ ᐱᕕᑦᓴᖃᕆᐊᖃᕐᒪᑕ ᐱᓇᓱᐊᕋᑦᓴᖃᕆᐊᖃᕐᓱᑎᓗ ᐃᑦᔭᕋᑦᓴᓯᐅᖑᒋᐊᖃᕐᓱᑎᓗ. ᓲᑭᐊᖅ ᓂᕈᐊᕐᑕᐅᒪᓂᕋ ᐃᓱᓕᓛᓕᕐᒪᑦ ᓯᑉᑎᒻᐱᕆᐅᓕᕐᐸᑦ, ᐃᓱᕐᕆᓯᕙᓪᓕᐊᑐᐃᓐᓇᓕᕐᑎᓗᖓ ᓂᕈᐊᕐᑕᐅᒪᓂᕐᒥᒃ. ᐅᕕᒐᕐᑐᐃᑦ ᓂᐱᖏᑦ ᑭᒡᒐᑐᖃᑦᑕᓱᒋᑦ ᓇᓂᓕᒫᖅ. ᐊᒥᓱᓄᑦ ᑲᑎᒪᓂᕐᓄᑦ ᐁᖃᑦᑕᓯᒪᓕᕐᑐᖓ, ᐃᓚᒃᑲ ᐃᓚᓐᓈᑲᓪᓗ ᕿᒪᑦᓱᒋᑦ ᓄᑖᓂᓪᓗ ᐱᒍᓐᓇᓂᕐᑖᖃᑦᑕᓱᖓ. ᑐᑭᓯᒪᓂᕐᓴᐅᓕᕐᑐᖓ ᓲᓱᑦᓴᓕᐅᒥᓯᒪᓕᕐᓱᖓᓗ ᓂᕈᐊᕐᑕᐅᔪᓂᒃ ᑭᒡᒐᑐᕐᑐᓂᒃ ᐅᑭᐅᓕᓐᓂᑦ 40 ᐅᖓᑖᓄᓪᓗ ᓴᐱᓕᓚᐅᕐᓯᒪᒐᑎᒃ. ᐊᓱᒎᕐᓕ, ᐊᕐᕌᒎᓂᑦ ᐊᒥᓱᒋᐊᓪᓚᓂᑦ ᑭᒡᒐᑐᕈᒪᕗᖓ. ᓇᑯᕐᒦᑐᖓ ᓯᓚᑐᓂᕐᒥᒃ ᑐᓂᓯᖃᑦᑕᓚᐅᕐᑐᓂᒃ ᐅᕙᓐᓂᑦ ᑕᓯᐅᕐᓯᖃᑦᑕᓚᐅᕐᑐᓂᓪᓗ ᐅᓪᓗᒥᒧᑦ, ᐊᒻᒪᓗ ᐱᔪᒥᓇᕐᑎᓯᒋᐊᓪᓚᖃᑦᑕᓂᐊᕐᑐᓂᒃ ᐅᕙᓐᓂᑦ ᐃᓕᓐᓂᐊᑎᑦᓯᓂᒃᑯᑦ. ᐃᓅᓯᕋᓂ ᑐᕌᕐᓂᖃᕐᑐᖓ ᐱᐊᕌᐲᑦ ᐅᕕᒐᕐᑐᐃᓗ ᓯᓚᑐᓵᕐᑐᓴᐅᖕᖏᓂᖏᓐᓂᑦ ᐃᓅᓯᕐᒥᓂᑦ. ᐊᓕᐊᒋᔭᖃᓲᖑᔪᖓ ᐊᓕᐊᓇᕐᑐᓂᒃ ᐃᓕᑦᓯᓇᕐᑐᓂᓪᓗ ᓱᓇᑐᐃᓐᒻᓇᓂᒃ, ᐱᓇᓱᒐᕆᒍᒪᔭᕋᓂᑦ, ᐃᓅᓯᕋ ᓄᓪᓚᖓᑦᓯᐊᓗᓂ ᐊᒻᒪᓗ ᑮᓇᐅᔭᓂᑦ ᓄᐊᑦᓯᓯᒪᑦᓯᐊᓗᖓ, ᐃᓚᖃᓕᕐᓗᖓ, ᐊᓂᕐᕋᖃᕐᓗᖓ ᑲᑉᐱᐊᓇᖕᖏᑐᒥᓪᓗ, ᓄᓇᓕᖃᕐᓗᖓ. ᑕᒪᓐᓇ ᓇᐅᓕᒫᓄᑦ ᐱᔭᐅᒪᖁᓇᕐᑐᖅ! ᐅᕕᒐᕐᑐᐃᑦ, ᐃᓚᒋᕙᐅᑎᓪᓗᖓ, ᐅᐃᕆᒪᓇᕐᑐᓄᑦ ᓄᓱᑦᑕᐅᖃᑦᑕᓯᒪᔪᒍᑦ, ᖃᐅᑕᒫᑦ ᐃᓅᒐᓱᐊᑐᐃᓐᓇᓱᑕ ᑲᕋᓱᑦᑐᑎᑐᑦ. ᓄᓇᓕᕗᑦ ᐱᐅᓂᕐᓴᒧᑦ ᐊᓯᑦᔨᖁᓇᕐᑐᑦ, ᐃᓄᐃᓪᓗ ᑕᑯᒍᒪᑦᓱᒋᑦ ᐱᒍᓐᓴᓯᐊᕐᑐᖅ ᓇᒻᒥᓂᖅ ᐊᐅᓚᑦᓯᓗᑎᒃ ᖃᐅᔨᒪᐅᓯᕐᑖᕆᐊᓪᓚᕈᒥᓇᕐᓱᓂᓗ ᐃᓄᐃᑦ ᐃᓗᕐᖁᓯᖓᓂᑦ ᐅᖃᐅᓯᖓᓂᓪᓗ. ᓇᒧᖕᖓᕋᓗᐊᕈᒪ ᐃᓅᓯᕋᓂ, ᐅᕕᒐᕐᑐᓄᑦ ᐃᑦᔭᕋᑦᓴᓯᐊᖑᒐᓱᐃᓐᓇᐸᓐᓂᐊᖁᖓ ᑭᖑᕚᑦᓴᕗᓐᓄᓗ. ᐁ ᓚᖃᑦᓚᕆᑦᓯ ᐅᕙᓐᓂᒃ ᑳᐱᑐᖃᑎᖃᕐᓗᓯᓗ, ᓄᔭᒃᑲ ᕿᓕᕐᓯᖃᑦᑕᓗᒋᑦ ᐃᓄᒻᒪᕆᖕᖑᐸᓪᓕᐊᑎᓪᓗᖓ ᐊᑦᔨᒌᖕᖏᑐᓂᓪᓗ ᑕᐅᑦᑐᓕᐅᖃᑦᑕᓗᒋᑦ Manic Panic-ᒥᑦ ᓄᔭᒃᑲ! ᒥᕐᓱᖃᑎᒌᓪᓗᑕ! ᙯᓯᒪᕗᖓ ᕿᒣᓂᐊᔭᖕᖏᓚᖓ ᐃᓕᑦᓯᓂᑦ!
ᔮᓂᔅ ᐸᐅᓴᓐᔅ
