ᓄᐃᑕᐅᔪᑦ N° 10

ᐅᓪᓗᒥ ᖃᓄᖅ ᐅᕕᒐᕐᑐᓂᒃ ᐃᒫᙰᕆᐊᕈᓐᓇᐱᑦ ? «ᐊᑑᑎᓯᒪᔭᒃᑲ ᐅᖄᓚᖓᔭᒃᑲ. ᐊᑦᔨᒌᖕᖏᓇᑦᑕ ᐃᓘᓐᓇᑕ ᓱᕐᕋᑕᐅᓯᒪᓂᕗᓪᓗ ᐊᑑᑎᓯᒪᔭᑦᑎᓄᑦ ᐊᑦᔨᒌᒐᑎᒃ. ᐅᖄᕕᒋᖃᑦᑕᓗᒋᑦ ᑕᑎᒋᒍᓐᓇᑕᑎᑦ, ᓴᐱᕐᓇᕋᓗᐊᕐᐸᑦ, ᐅᖄᖃᑦᑕᓗᑎᑦ ᖃᓄᖅ ᐃᑉᐱᓂᐊᓕᕐᒪᖔᕐᐱᑦ. ᐅᖄᓗᑎᑦ ᑲᓄᖅ ᐃᓕᓐᓂᒃ ᐃᑉᐱᓂᐊᕐᑎᓯᒻᒪᖔᑕ. ᓱᓕᓗ, ᐃᒥᐊᓗᒻᒥᒃ ᐊᕐᕌᒍᓂ ᐊᒥᓱᓂ ᐊᑐᖃᑦᑕᓯᒪᔪᖓ ᐃᓅᓯᑦᓴᑐᐊᒍᔪᕆᑦᓱᒍ ! ᑭᓯᐊᓂ ᖃᐅᔨᒪᓕᕐᑐᖓ ᐃᓅᓯᑦᓴᑐᐊᒍᖕᖏᑐᕕᓂᐅᒋᐊᖓᓂᒃ. ᐃᓅᓯᓕᒫᒍᖕᖏᑐᖅ ᐱᖃᑦᑕᓗᒍ ᖃᓄᐃᖕᖏᑐᖅ. ᑭᓯᐊᓂ ᐃᓅᓯᕐᑕᕆᔭᐅᓯᒐᒥ, ᓈᒻᒪᖏᑦᑐᖅ ! ᐱᖃᑦᑕᖏᑦᓯᐊᓗᒍ ᐱᐅᓂᕐᓴᖅ. ᐃᒻᒥᓂᒃ ᑲᒪᒋᑦᓯᐊᓗᑎᑦ ᐃᓕᓐᓂᒃ ᑲᒪᑦᓯᐊᕆᐊᖃᕋᕕᑦ. ᑕᕐᓂᖃᕋᕕᑦ ᐃᓱᖃᖕᖏᑐᒥᒃ ᑲᒪᒋᑦᓯᐊᕆᐊᓕᓐᓃᕕᑦ. ᐅᖃᕐᑕᑎᑦ ᐃᑉᐱᒋᑦᓯᐊᓗᒋᑦ. ᑌᒣᖃᑦᑕᕈᓐᓀᓗᑎᑦ. Edison ᓴᐅᓴᕕᑦᓱᓂ ᑕᒻᒪᖃᑦᑕᓯᒪᔪᖅ ᐃᑯᒪᐅᑎᐅᑉ ᐳᓪᓚᖓᓂᒃ ᓄᐃᑦᓯᑐᐃᓐᓇᕋᑕᕐᓱᓂ. ᐆᑦᑐᕆᐊᓪᓚᖃᑦᑕᕆᑦ. ᓴᐱᓕᕐᑌᓕᓗᑎᑦ.»

ᐃᓅᓯᒃᑯᑦ ᓱᓀᑦ ᐊᑦᔨᐅᖏᑦᑐᓚᕆᐅᓂᕐᓴᐅᓕᕐᖃᑦ ᐅᓪᓗᒥ ᐃᓕᓐᓄᑦ ᐅᕕᒐᕐᑐᐃᑦ ᐃᓄᒻᒪᕇᓪᓗ ᐊᑯᓐᓂᖓᓂ ? «ᓂᖕᖓᓵᕆᖁᔭᐅᖃᑦᑕᓯᒪᖕᖏᑐᒍᑦ ᐃᓅᖃᑎᑦᑎᓂᒃ. ᓱᕖᕈᑦᑎᓯᓯᒪᖃᑦᑕᕈᓐᓀᓗᑎᑦ ᐱᐅᖕᖏᑑᑎᑦᓯᖃᑦᑕᕈᓐᓀᓗᑎᓪᓘᓃᑦ, ᐃᓄᒻᒪᕆᓐᓂᒃ ᓲᓱᑦᓴᓯᐊᕐᓗᑎᑦ, ᐊᖓᔪᑦᓯᐅᒫᐱᒐᓗᐊᕐᐸᑕ ᐃᓕᓐᓂᑦ. ᐃᓂᕐᑎᑕᐅᒋᐊᕈᕕᑦ ᑐᓴᕐᓯᒪᒐᓗᐊᕐᒥᔭᕐᓃᕕᑦ ᐃᒻᒪᖄ ᐃᓂᕐᑎᑕᐅᒍᑎᑎᑦ ᐃᓱᒪᑦᓯᐊᕆᐊᕈᑎᒋᒍᓐᓇᑕᑎᑦ. « ᐃᓅᖃᑎᒃᑲ ᑕᑯᓴᖃᑦᑕᕈᓐᓇᓯᒪᖕᖏᑕᒃᑲᓘᓐᓃᑦ ᐃᔨᓐᓄᑦ, ᐱᓕᐅᑦᔨᖃᑎᒋᑐᐃᓐᓇᑑᔮᕐᓱᒋᑦ.» ᓯᕗᓂᕐᒥ ᐅᕕᒐᕐᑐᐃᑦ ᓱᓇᓂᒃ ᑕᑯᕕᒋᒍᒪᔭᑎᑦ ? “ᐅᕕᒐᕐᑐᐃᑦ ᑲᒪᑦᓯᐊᖁᔭᒃᑲ ᐃᓕᕐᖁᓯᑦᑎᓂᒃ ᐅᖃᐅᓯᑦᑎᓂᓪᓗ, ᐅᖃᐅᓯᑦᑎᓂᒃ ᐊᓯᐅᔨᑦᑌᓕᓗᑎᒃ, ᖃᐅᔨᒪᔪᖓ ᐅᖃᐅᓯᕐᒥᓂᒃ ᐊᓯᐅᔨᖃᑦᑕᓯᒪᔪᓂᒃ. ᑐᑭᓯᒐᑦᓴᓯᐊᑦ ᐊᓐᓀᔭᐅᓲᑦ ᐅᖃᐅᓯᐅᑉ ᐁᑉᐱᐅᑎᖓᓅᔭᕐᑕᐅᓕᑐᐊᕐᒪᑦ ᐅᖃᐅᓰᑦ. ᐃᓕᕐᖁᓯᓕᕆᔪᖃᓕᕐᐸᑦ ᕿᑐᕐᖓᓯᓐᓄᑦ ᕿᒻᒪᑯᒐᑦᓴᑖᑦᓯᐊᕈᓐᓇᑐᓯ. ᑲᕙᐅᒻᒥᓯᒪᓕᕈᕕᑦ ᑲᕙᐅᒻᒥᓯᒪᒍᑎᑎᑦ ᐃᓱᒪᒋᒍᓐᓀᓴᐅᑎᒋᒐᓱᐊᕐᓗᒋᑦ. ᓴᐱᓕᕐᑌᓕᒋᑦ, ᑌᒣᓕᖓᑦᓭᓇᓲᒍᖕᖏᒪᑕ ᓱᓇᓕᒫᑦ ! ᓴᐱᕐᑌᑑᓂᕐᓴᒪᕆᐅᓂᕐᓴᐅᕗᓯ ᐅᕙᑦᑎᓂᑦ. ᑲᔪᓯᒋᑦᓯ. “ᑕᕝᕙᓂᑦᓭᓈᖃᑎᒌᖕᖏᑐᒍᑦ, ᐱᓗᐊᕐᑐᖅ ᐊᖓᔪᕐᖄᑎᓐᓂᒃ ᑕᕝᕙᓂᑦᓭᓈᖃᑎᖃᕋᑕ. ᐊᖓᔪᕐᖄᕗᑦ ᐱᒍᓐᓇᕕᓕᒫᒥᒍᑦ ᐱᒐᓱᐊᕐᓯᒪᔪᑦ.” ᐊᐱᕐᓲᑎᑦᓴᖃᕆᐊᓪᓚᕈᑦᓯ, ᖃᐅᔨᑎᑕᐅᒍᒪᕗᖓ ! ᓇᑯᕐᒦᒃ,

ᓕᓐᑕ ᖃᐅᑦᓵᓕᒃ

ᑲᑎᒪᔨ – ᑕᓯᐅᔭᕐᔪᐊᒥᐅᑦ ᑭᒡᒐᖓ